上星期幾場亞洲波都叫做有水準，日皇盃前鋒小勝飛腳1:0，下盤有得走，就中個「細」，FC麥克阿瑟、中岸水手、FC悉尼呢三場澳職都叫中晒，不過今個星期周中冇晒亞洲賽事，咁就等我轉返老本行，講吓意甲啦。
周三幾場波，以AC米蘭（圖）主場對祖雲達斯最好睇，星期日小弟都有份幫電視台評述AC米蘭，就先講吓米蘭嘅變化；首當其衝最緊要就係伊巴謙莫域嘅加盟，「呂布」一到，以佢嘅江湖地位，令到前線班友仔人人自危，發揮晒所有潛力，上年表現真係好一般嘅查漢奴古，今季就脫胎換骨，中場中基斯爾一個都掃晒，相對今場對手祖記，對方真係有啲老態，形成強烈對比。
祖記前線冇咗希古恩，換咗艾華路莫拉達，又唔見得有咩化學作用出現，保羅戴巴拿反而出場時間開始增多，教練派路試嚟試去都未搵啱中場心水組合，後防就保持失波，唔再係以前咁穩陣。基斯坦奴朗拿度其實𠵱家對啲較弱球隊先發揮作用，當對住強隊，對抗上已經見到有啲吃力，連個叫糊人物都唔睇好，初盤祖記作客要讓平/半，我當然就畀米蘭，加多個「大」。
另一場就畀拖連奴主場對維羅納；拖連奴呢隊波要分析就簡單得多，一個字「大」，最主要係前鋒比洛迪，近期唔知食咗乜，好入得波，近呢三場又好捱得，周三主場對維羅納，都係一支硬嘢嚟，連續七場都有波入，今場應該都係大手交易！
文：黃耀富
截稿前馬會尚未開盤，盤口僅供參考，讀者記得留意足智彩網頁。
AC米蘭是意甲兩支主場不敗之師之一，7場比賽累積4勝3和。