有線新聞上個月大地震，40個資深員工被裁，引發多位記者同採訪主任辭職明志。一個月話咁快就過，好多員工就快last day，對有線節目嘅影響亦陸續浮面。繼幾日前元旦有「新」中國組登場，第一炮就用中國官媒CCTV嘅罐頭古做頭條，簡直慘不忍睹。一不離二，今次到「財經資訊台」出事，好多個節目無聲無息消失。
八方最近扭開「財經資訊台」，發現節目安排大幅改動，喺9點港股開市時分析最新金融走勢嘅《開市埋位》突然消失，將以往10點先播嘅《交易所直播室》推前。本來喺10點半播嘅《財經Facetime》無咗，改為將《窩輪攻略》推前。推前咗幾個節目，咁原先嘅空檔點處理？有線就諗咗一招「對應」，由11點至12點半狂loop有線新聞。幾個下午嘅專題環節，例如《講樓論市》、《解盤A股》同《夠鐘收市》都被抽起，改為翻兜朝早播過嘅《灣區直送》同《每日樓市》。留得低嘅《一期一匯》同《交易所直播室》，就要拖長節目時間嚟填返個氹。八方就咁數，已經發現有最少五個節目無咗。
八方打聽過財經組人手狀況，原來除咗樓盤林靜雯同財經高嘉輝兩個採主未遞信，其餘人早已遞信，助理新聞總監顏寶剛已經last day，副財經編輯主任黃國禧亦就快last day，仲有三個資深編輯主任同記者2月前就會離職，八方聽聞「四人幫」非常緊張，甚至挽留部份人，不過最終失敗。整個財經組嘅編輯室亂晒大龍，得返一個編輯無辭職。之前有線中國組齊齊起身，支援嘅同事得返一個亞視出身、「骨精」手下猛將，再加一個上年9月仲喺《大公報》寫文化古嘅記者。得返咁嘅班底，仲邊有力支援財經組。咁多調動係咪因為失血過多？有線回覆八方，「以上為節目調動，我們沒有回應」。
李八方