進入1月份，納指估計將喺接近月線圖保歷加上軸開市，但未見到月份開市價高過上軸嘅終極見頂訊號。環球市場氣氛仍然理想，升勢能否頂到成個月仍未可料，但進入2021年之前，港股個股走勢突然比美股仲要強，短期升勢開始唔只側重光伏、汽車、生科等等，個別幾個月來進入調整嘅股份，開始築底回升，唔少個股同樣由弱轉強，睇嚟1月嘅某個短時間內，有可能出現雞犬皆升嘅局面，連落後股都有得炒。落後股方面，可以留意約半年前上市嘅新股，由高位至今累積唔少跌幅，最近開始觸底回升。
另一個潛在翻生板塊係券商股。由舊年3月大跌市見底至今，嚴格嚟講只有7月初大炒過一轉，以較弱勢嘅中信證券（6030）為例，撇除7月初嘅3個大升交易日之外，其餘時間都冇升過，至今近半年更加係呈慢跌狀態。目前恒指升到3月以來高位，港交所（388）亦已展開半個月嘅新升浪，只要1月市況繼續好，同大市同步嘅券商股有機會出現久違升勢。
論券商比較強嘅係美股上市嘅富途，其次係港股嘅耀才（1428），假如耀才能夠重覆7月升浪，短期內有機會挑戰3蚊，論走勢似醞釀新升浪，可以一博。
晉佳