民陣喺元旦日為爭取釋放政治犯舉辦車巡後，唔少民主派區議員同民間電台，噚日繼續無懼寒冬擺設街站，呼籲巿民喺寫有「釋放政治犯」嘅橫額上簽名，向現時喺獄中嘅手足表達關心，以及香港人至今未放棄爭取五大訴求嘅訊息。呢啲場合不時有藍絲踩場搞事，今次就係「大波Man」石房有，但佢就踩場不成，反而俾現場市民鬧到敗走，親自示範民意究竟企邊一邊。
民陣前召集人、社民連副主席岑子杰噚日喺深水埗港鐵站外擺街站嗌咪，話立法會冇咗林鄭最憎嘅民主派議員後，林鄭施政亦唔見得有任何改善，其間唔少巿民對岑子杰發言深感認同，紛紛上前喺橫額上簽名支持。
向來游手好閒、嗜好係去民主派街站踩場搞事嘅大波Man，噚日下午就揸住部手機去岑子杰街站踩場，點知只見惹來大批巿民圍住爆粗狂鬧。其間有巿民向「大波Man」高喊：「死X開啦！大波Man！你係香港人嚟嘅咩？」、「大波Man，你仲未死咩？」岑子杰就相對斯文，只係呼籲巿民要同可能係武肺帶菌者嘅大波Man保持適當距離。
最終大波Man喺在場巿民一片指罵聲中，喺現場留咗一分鐘多啲，就極速鬆人敗走，睇落對身處喺去年區選中已被民主派「光復」咗嘅深水埗相當冇癮。特首林鄭月娥成日話政府、建制有廣泛民意支持，如果現實真係咁，大波Man點會俾市民鬧到敗走？
李八方