2002年港姐季軍胡家惠（Cathy）本來是幸福闊太，但2016年陀住第二胎時發現前上市公司CEO前夫邱仲平有外遇，經歷離婚、自殺、患上躁鬱症後，2018年帶住兩個女兒重新出發，尋找人生價值，做義工及愛心湯包捐贈獨居長者，去年又在中環開美容院。不過，美容院一開就遇上武肺疫情，事隔多個月，仍要關閉停業。幸而，她無心插柳的愛心湯包「靚湯Souper」生意，卻逆市突圍，生意額急升十倍，今個月更擴充搬office、請人兼出新產品， 2020年瘋狂又困難，上天卻為她打開另一道大門。
撰文：林妙萍
胡家惠去年3月曾接受《蘋果》訪問，當時對疫下生意受影響處之泰然，坦言「最緊要留返條命，留返條命就乜都做到！」今日的她，坐在剛搬的二千多呎寫字樓受訪，窗外可見獅子山風景，她忍不住開心介紹新辦公室：「講你都唔信，其實兩個星期前 ，我哋office係得三百呎咋，坐五個同事，人人背貼住啲貨同紙箱坐，好逼嘅，𠵱家大咗六、七倍，仲有齊廚房、十人枱、自己嘅貨倉，真係好開心。」裝修時決定加入廚房、可換不同風格的布幕，方便下月開始拍片開YouTube channel。
其實Cathy原打算全心全力做美容生意，但因疫情繼續停擺：「 我嘅美容院開咗一年，直情好似冇開過業咁滯。2019年9月開，跟住社會運動，疫情1月開始，我哋3月停咗一次業喇，7、8月又停咗兩個月，𠵱家又再停過，好慘！租金太貴又冇得減，同埋我哋係照出糧畀員工，政府有補貼，但幫唔到幾多。」
疫情搞足一年，不少人要work from home，很多時又不能外出用膳，Cathy的即食湯包生意因禍得福，營業額和去年對比勁升十倍，她說：「 嗰時唔係正式做，主要係做嚟捐贈用，一個月捐一、二百包咁。後來越捐越多，𠵱家累積捐咗六千幾包畀獨居長者。但靠捐，係唔可以維持個生計，所以真係要做生意，就變咗當一個business咁持續去run。」
Cathy甚有商業頭腦，自家湯包品牌發展得很快，短短幾個月已擴充，更計劃出即食健康家常菜、賀年花膠菜式等，她笑言：「秘訣都要勤力囉，我一日做16個鐘頭㗎，同埋要做好個branding。疫情下啲人唔敢出街，所以都幫咗我哋幾多，我哋已經上咗架，在網上有得賣，在線下嘅超市都有，因為要快、要方便，性價比高。同埋我係媽咪有兩個女，食嘅嘢要健康。」
離婚重新振作後，Cathy領悟到一個女人不應該只為男人而活，要有自我價值，亦勉勵同路人要爭氣。回首從前，她曾和前夫一齊打拼，成功將生意上市，現在做湯包生意，目標也是上市？她說：「邊有咁快呀？冇去諗上市，𠵱家只希望多啲人認識，同埋希望做到市民接觸到嘅地方，都買得到。」
更多精采時尚內容，盡在http://add.appledaily.com。