前熱刺領隊普捷天奴會執教巴黎聖日耳門（PSG）嘅消息，由聖誕開始傳咗都成一個禮拜有多，終於上周六先正式官宣，雙方簽約到2022年夏天，另加一年優先續約條款。雖然普捷天奴喺球員時代曾經效力過PSG，但當時PSG仲未算係豪門球會，而普帥亦未曾有執教豪門嘅經驗，佢點同球星尼馬、基利安麥巴比等打好關係，自然成為外界焦點。同以前教熱刺時一手帶起哈利卡尼、迪利阿里唔同，佢哋會當普帥係恩師乖乖聽話，但尼馬等球星未必會聽普帥支笛，不過肥普就大派定心丸：「我想講我會同班球員好親近㗎，我對佢哋好大期望，我希望球員同職員之間可以建立友誼，每個人都會係重要嘅一部份。」肥普仲話：「我認為呢間球會一直追求一啲值得着起PSG波衫嘅球員，我認為呢度有一個好正嘅陣容，佢哋都想贏獎盃，而我哋嘅目標就係要確保每個人都向住同一個目標進發，我嘅理念係想每個人都會想為球隊贏到更多波，組成一間結構強大嘅球會。」