踏入2021年，香港警暴問題未解決，POPO過去大半年唔止全力篡改佢哋嘅黑歷史，仲無所不用其極洗白，為警隊暴行塗脂抹粉。最新一個被利用嘅「人辦」係鐵路應變部隊（RRT）嗰個所謂做齊四個特警部門嘅李姓教官，近日佢接受傳媒專訪，當然少不免用「黑暴」做話題，話自己前年9月目睹有個身形健碩嘅「所謂老師」帶住年輕人去大圍站掟雜物到路軌，之後「劇情發展」當然一如所料，變成個「老師」自己走甩咗，但「小朋友」就被佢哋拉咗。李姓教官仲不忘為劇情加入煽情部份，話問個「小朋友」點解要咁做，除低對方個口罩時，「佢眼淚已經流到成面濕晒」。
大家睇到呢到，評語應該一致，都係「零分重作」！先唔講所謂帶頭「老師」家陣人又捉唔到，咁憑咩認定佢係「老師」先？又想抹黑教育界？至於「小朋友」眼淚係咪流到成面濕晒，大家睇直播見過數以千計青年被濫捕，幾曾有「小朋友」咁樣？定其實係你哋向佢塊面射胡椒噴劑呀？網民就一面倒只係想問一個問題：元朗7.21你哋去咗邊？係元朗站唔屬於鐵路警區，所以說好的接報後九分鐘到場，最後變成一直冇影？
POPO成日話要認清真假，市民需要了解「有心人」點樣製造假資訊，所以八方都有盡力求證，前年9月係完全冇任何新聞報道過大圍站有人掟雜物去路軌，連港鐵都冇咁提過，更冇報道提到相關拘捕，呢個資訊係咪可信，大家可自行判斷。
李八方