蘇超新一年首戰就上演「老廠打吡」，今季仲未喺聯賽輸過嘅一哥格流斯哥流浪，上周六主場迎戰排第二位嘅死敵些路迪，最終靠對方一記烏龍波奠定1:0勝局，拉開同對方嘅距離至19分，佢哋嘅領隊謝拉特有望贏得人生首座聯賽冠軍。
格流喺謝四領軍嘅第三季，終於有機會一搔10年之癢。八年前，佢哋因為逃稅官司敗訴宣佈清盤，仲俾聯賽會裁定要降落第四級聯賽。冇咗佢哋嘅蘇超就梗係些路迪玩晒，結果對上九季都係呢支最傳統班霸做盟主，就算格流喺16/17球季返番上嚟，但實力大打折扣下，一直無法推翻呢個局面。
格流三年前搵嚟謝四執教，嚟到今季，謝四終於有機會帶領格流打破壟斷，開季踢咗22輪，竟然至今一場都未輸過。今場對碰，上半場戰情膠着，但去到63分鐘戰局出現變化，些路迪中堅尼亞比頓紅牌被逐，結果踢多一個嘅格流就喺七分鐘後靠角球攻勢，皮球省中些路迪隊長卡林麥基哥後改變方向入網贏1:0。
雖然些路迪踢少格流三場，但家陣落後到19分咁多，就算3場補賽全勝都仲差10分，而且格流今季無論得失球都喺些路迪之上，大有機會贏得10年以嚟首個聯賽冠軍。不過，大家都知道謝四球員生涯嘅黑歷史，呢位利記傳奇喺13/14英超球季就試過因為季尾對車路士場波，唔小心喺後場跣低俾對手前鋒丹巴巴亞偷到個波後射入，結果輸波收場全失三分，令本身喺聯賽榜領先嘅利記俾曼城過頭，可以話係一跣跣走咗個冠軍，係佢人生一個污點。
唔知係咪呢啲不快回憶喺個腦海度，所以謝四講嘢都特別小心同謙虛。佢一星期前仲認世紀一跣對佢人生有非常大嘅影響：「喺我利物浦生涯最後階段，發生呢件事真係好殘酷，但又可以話係一種動力，尤其我好清楚外界嘅聲音，我哋要確保真係捧咗盃先，否則啲人就會講你份工係咪做得唔好。」今場賽後謝拉特亦好謙虛咁話19分都唔應該咁老定，唔好去諗領先幾多，而係應該諗下場先實際。真係好希望「Humble G」就算球員身份捧唔到聯賽錦標，都可以領隊身份填補遺憾。