最老土嗰句，好多嘢都係整定。正如葉巧琳說，《全民造星III》進十強時的殘酷賽，她對決同組的顧定軒（Zeno）以驚艷歌藝一面倒五票勝出，是整定。她說：「換轉我對住ANSONBEAN（陳毅燊）？」
訪問在決賽前四天進行，能否得到冠軍都不重要，「難得可以去Star Hall，我諗我入咗行咁耐，可能喺頒獎禮踩過吓個台……」以往總是唱商場騷，或做同門師兄陳柏宇的嘉賓，如今一個九展，都可以勝過紅館。
入行七年，葉巧琳今天才為人認識，「啱啱做完Viu行出嚟有人嗌Mischa，可能因為我個頭（髮色）易認；呢個咪就係《全民造星》嗰個，可能都未必噏得出名，但會認到！」
最大分別是從未如此忙碌過，剛完成Viu的拍攝，趕來訪問現場，完成後又要趕下場訪問，還有Ig粉絲幾級跳，「我未參加之前六千，𠵱家二萬幾囉！我覺得逐步去畀大家睇到，我已經好滿足！」
比賽只是一時，唱歌是一世，葉巧琳夢想是開一間琴行。
撰文：文嘉龍
由比賽初期被評判說性格毫不突出，依然一關一關拼下去，然後有《給十年後的我》的真情流露，然後再有罕見的性感舞衣唱起《Lady Marmalade》，一開口，已經令花姐和林二汶狂呼，葉巧琳的名字得以在《造星III》重生。
能夠去到最後關頭，葉巧琳已算超額完成，「好似《Lady Marmalade》唔會再有一個機會咁樣去嘗試；唔會以一個音樂劇形式做到《給十年後的我》……我嘅壓力係來自想做好一個表演，多過話想去贏，如果好似《全民造星I》有一百萬或者有架車，我當然好想贏啦，但我覺得今次已經贏咗！咁多年終於有人聽到我嘅聲音，有人聽返我以前嘅歌，其實已經覺得好好彩。」
《造星》前後的改變，葉巧琳說，終於可以令人聽見她的心聲，「因為一路以來，大家都唔知點樣用一個切入點去聽我嘅故事，我又懶得開live去畀人睇我。我知道點樣enjoy一個表演，以前可能上到台，唱完一首歌就『多謝晒』然後就走，𠵱家好想將我自己嘅心聲，多啲去畀人睇到、畀人聽到。」
入行七年，因為一個《全民造星》才令人發現，究竟應該開心抑或替自己之前的光陰覺得可悲？「其實我又唔介意。因為七年前係組合，五年前先至真係自己（單飛發展），我唔介意揣摸咗咁耐。其實未參賽之前，我自己都未清晰條路要點樣行，變咗好難去突破，如果五年前突然間有一隻歌好紅好爆，可能心態同𠵱家會好唔同，我寧願慢慢捱慢慢成長，多過突然之間上到天花板，因為我覺得你越去到幾高，你跌得越痛。我𠵱家慢慢捱出成果，反而更加開心囉！」
葉巧琳說，很多時候要行到懸崖，才逼出生存力量，「我唔係好鍾意喺鏡頭面前喊，但係呢個節目，每一次都見到我喊，我忍唔到，我好開心做到《給十年後的我》，呢個係我最難忘嘅一個轉捩點；之後《Lady Marmalade》，我從來冇諗過可以做到女團，身邊三個都係好跳得，我係唯一一個唔跳得，但係我都衝破咗自己。原來當你去到懸崖邊緣，你要生存就要發揮人類極限，原來可以做到，好多嘢可以逼出嚟！其實你未試過，點會知道自己唔得呢？」
演藝學院主修音樂的葉巧琳，2013年與兩位演藝同學Mike和Pong，一齊參加唱片公司舉辦的歌唱比賽贏得冠軍，以三人組合名義簽約Sony而出道，「阿Mike同阿Pong都係我APA同學，佢哋兩個都係作曲系。有同學仔想叫我參加，有少少誤打誤撞參加咗比賽，唱片公司想簽我哋，不如試吓啦！」
如果大家連葉巧琳的名字也沒有印象，更不用說她、Mike和Pong組成的三人組合樂遊團，「我自己都有反思，點解好似唔work呢？可能我哋太新，band係好難去做，始終本身要好friend，雖然我哋係friend，但係我哋音樂種類偏向有唔同，變咗唔係好work！我哋冇影響到感情，佢哋亦好enjoy去做緊幕後音樂工作，佢哋好支持我參加《造星》，喺social media幫我post快啲投阿Mi一票！」
葉巧琳其實不叫葉巧琳。2015年由組合單飛發展前，她名叫葉泠（音令），「大家都冇印象啦！啲人話唔好呀，成日俾人叫錯咗你個名，唔係一件好事！葉泠係我阿爸改，我阿爸話浩浩泠泠，即係話唱歌清澈嘅一個字，好啱呀，清澈嘅聲音，但係唔work！我solo（個人發展）就即刻改，搵咗算命師傅幫我改咗葉巧琳呢個名，我自己又幾鍾意喎，一路都發展OK！」
發展尚可，但收入多年來一直都不穩定。葉巧琳讀演藝期間已經在琴行當歌唱老師教小朋友唱歌，即使入行後有當兼職，因為單以唱歌收入根本不夠生活，「我自己目標係開音樂studio，讀緊書已經喺琴行教緊，我想擁有自己嘅琴行。」
今年疫情令到她的教唱生涯停擺，整整大半年零收入，「日日喺度等，唔知等乜！始終教唱歌係近距離，唱歌就一定唔可以戴口罩！疫情好嚴重嘅時候，收入又唔穩定，我自己諗點樣可以維持生活，我係咪應該繼續行落去，唔知點解有陣時就好似整定，公司喺疫情好返啲嘅時候，就話出埋第三隻歌（三部曲），我6月入錄音室，跟住就有《全民造星》呢個電話，公司打畀我問我參唔參加，我考慮咗一晚，參加囉，如果唔係都唔知做乜，我知道承受壓力可能好大，但𠵱家諗返轉頭又好似冇乜嘢！零收入半年，有時會有好少嘅版稅，但真係好少好少，要多謝我屋企人支持、多謝我身邊伴侶支持我，如果唔係真係捱唔到落去！」
葉巧琳參加《全民造星III》之前，閃過轉行之念，「有一剎那呢個念頭閃過，公司就打電話畀我，所以有時真係估唔到！」轉行做乜？「地產。我真係諗住去考牌，諗住一技傍身考返個牌先啦！其實地產都好慘，因為疫情關係，考牌嘅考試改期改到不得了！我知道身邊朋友去考，我就話不如大家一齊去考！唔知點解有時當你最想放棄嗰一刻嘅時候，就會有另外一個機會畀你囉！」
因為《造星III》亦令葉巧琳重遇自己的學生，當年的小朋友，今年已經是中學生，「我嘅學生們都知道我做緊呢一行，佢哋都好體諒，因為我未必可以每一個禮拜都正常時間上堂，佢哋都明白。有一個學生小學跟我，𠵱家已經中二，終於擁有自己一個電話，佢問媽咪攞咗我電話跟住message我，跟住猛咁問我內幕消息，好搞笑！」
正職歌手，斜槓生活教唱歌的葉巧琳，慶幸出身小康之家，沒有養家擔子，但對已經退休的父母多少有點歉疚，「我自己覺得好唔好意思，因為佢哋供養咗我咁多年，我好想有啲回報畀佢哋，但係我爹哋媽咪會覺得，你唔使再使我錢，已經係一個好好回報。未搬出去之前，我喺演藝學院讀書教好多學生，嗰時除咗住喺屋企，燈油火蠟食飯，我已經冇乜再問佢哋攞錢。我爹哋媽咪生我同哥哥都係比較年紀大，我唔開心係屋企嘅經濟，越搣越少錢嘅時候，佢哋𠵱家生活冇當初咁好，我就覺得好對佢哋唔住，佢哋𠵱家都要慳住生活。」
一直支持自己的，除了家人，還有一個同居多年的圈外男朋友。葉巧琳決定參加《造星III》開始，男朋友比她更為緊張，「佢一開始好唔想我參加，佢仲驚過我，驚我俾人鬧，佢驚我返到屋企會喊，咁我真係有返到屋企喊，頂唔順好大壓力！我好記得差唔多要拍《前傳》，叠住我哋round 1要比賽，我哋要拍MV，大家都知我唔識跳舞，跳得好辛苦，所以我返到屋企就崩潰喊咗，佢就話，退賽好唔好？我話，我唔要退賽、我唔制，我做到㗎，我只不過需要發洩一下！𠵱家節目每一集佢都好緊張，但係見到唔係佢想像咁差，佢都安心。」
葉巧琳推出過《水舞間》、《一對一》和《二人份》這個「水質女生戀愛三部曲」，真人與唱歌，現實都是水造，「以前我唔係成日喊，可能壓力大，我好易被觸動，我成日睇啲好無聊嘅劇，我都好快喊！我喺一啲好熟朋友面前，我係一個好眼淺嘅人，喺外面通常都會想逞強，我諗每個人喺人哋面前都唔會做一個最真實嘅自己，每個人喺社會做嘢，某程度上都係戴住一個面具去見人，除非你返到屋企對住自己啲貓、對住自己最親近嘅人，你先可以將呢個面具放低！」最後葉巧琳說：「但係我嚟緊派嘅呢首歌，我將個面具放低咗，想畀大家睇到一個最真實嘅我！」
識得tag埋新歌了，她真的學懂如何令人看得見。
公開有個拍拖近12年的男友，兩人同居多年，情緒比較易觸動的葉巧琳，每次在家中看戲都會喊出來，「我哋兩個喺度睇，跟住佢feel到我索鼻，佢擰轉頭，我已經喊緊，跟住佢就會話，你咁樣都可以喊嘅！」
男友與音樂圈子一滴關係都沒有，葉巧琳讀演藝時經朋友介紹認識他，「我哋啲common friend介紹而識，維持到𠵱家囉，已經係屋企人！」問到幾時結婚，她說：「好快就會知！哈哈，唔知呢！同居咗咁耐啦，所以我哋係有共識，如果有乜嘢喜訊會同大家講！」
應該都係好事近。
場地提供：COSMOS