兩位大富豪因「彈票」而鬧上法庭，全城皆知，於是中環人交換消息，想問個究竟，竟然有人問到左丁山，左丁山答曰：「邊度知得咁多吖！連『一知半解』都講唔上，大家唔好『一廂情願』咁講東講西」，以前一齊食飯，『大吹法螺』講呢件事，可以講到『天花亂墜』，但依家如果寫出來，慎防有後果。」
銀行佬對此等事最敏感，以前做銀行trainee時，左丁山要日日睇南早嘅法律訴訟欄，法庭上有何案件涉及銀行客戶，立即向上司匯報，銀行彈票訴訟，不論誰是誰非，客戶主任（以前叫Account Officer，現叫Relationship Manager）會立即將有關客戶條line（信貸額度）暫時凍結，搞清楚件事先，如果唔做嘢，畀上頭負責信貸風險嘅部門知道，想唔受責怪都幾難。賓架P覺得呢件事有啲「不可思議」，認為當事人如果在法庭上冇圓滿解釋，講到「天衣無縫」嘅話，與銀行往來關係好有挑戰性。
點解上述四字成語全部要用括號？皆因想大家留意吓。左丁山才疏學淺，平時讀書不求甚解，每有會意，便欣然忘食。上述成語用到慣晒，以為係日常用語㖭。呢日收到山光道東蓮覺苑出版嘅一本小書，書名：《源自佛教的成語淺解》，作者能度法師。法師早年在香港台灣讀書，1964年往新加坡，是當地愛道小苑，大乘精舍住持，藥師行願會創始人，多年來在佛教雜誌介紹源於佛經的成語，正本清源，講解成語之佛經本義。
不講不知，上述成語皆來自佛經，簡單如「一知半解」，出自宋代大慧宗杲禪師，圓寂後謚號「普覺禪師」，在《大慧普覺禪師語錄》卷十八中，有一段說話：「世間文章技藝尚要悟門，然後得其精妙，況出世間法只恁麼了得？這裏一千二百衲子，箇箇有一知半解，每來室中，道得諦當者甚眾。」禪師係告訴弟子，有些人似乎講到頭頭是道，似乎悟得禪法，其實個個都係識得一點點，「一知半解」，至流於錯誤。
能度法師授權東蓮覺苑出版呢本小書，功德無量，豈止左丁山受益，對佛經認識少之讀者，講吓「無遮大會」、「心猿意馬」、「一絲不掛」、「三生有幸」、「水乳交融」等等等嘅，皆可參考此書，用嚟教細路中文成語，更妙，家長與老師應該快啲買番一本研習。