【名家足路】
【對決場次︰史特加vs RB萊比錫】
2020年係一個諸事不順嘅年份，踏入12月筆者亦比較倒霉，貼波成日都開對家，結果繼8月後再次擂台包尾，自己亦由《一燈決》欄目嘅「始祖燈神」，成為咗新一年嘅首位燈神。不過！筆者依然唔會失去信心，相信新一年會有新開始，即管睇吓今個月對住人逢喜事精神爽嘅盧卡東尼，可唔可以喺一燈決贏番次。
作為新一年《一燈決》嘅頭炮，我哋揀咗場德甲史特加對RB萊比錫嚟較量，其實盧卡東尼喺舊年，已經成日讚史特加呢支「升班馬」有啲料到，不過佢哋進攻上好倚賴33歲嘅隊長卡斯特羅做組織，萊比錫只要封殺佢嘅傳球路線，史特加嘅威力就會大減。而且呢啲升班馬通常打道氣，唔少到咗下半季搶夠分就會走樣，史特加未必保持到強勢。
RB萊比錫就唔同啦，話晒都係上季歐聯四強球隊，實力明顯就勁過史特加，上半季身陷歐聯死亡之組，雙線作戰踢到𠵱家，都只係落後榜首嘅拜仁慕尼黑兩分，今場贏埋隨時有機會做一哥，鬥心贏晒。
萊比錫已經連續四場冇失波，係德甲唯一一隊失球數字仲停留喺單位數，防守力厲害之餘，呢支球隊野心都好大，上個月就宣佈喺一眾歐洲豪門手中，搶贏咗匈牙利超新星施素保斯拉爾，呢位匈牙利足球史上身價最高嘅球員，今場仲有機會地標上陣證明自己，中場創造力大增，就算表現一般嘅尤素夫保臣浪費極都仲有大把機會，近5場贏足4場嘅RB萊比錫今場只係讓半/一，一於捧上盤喇！
文：尊嘉
《一燈決》係今季新欄目，由上月擂台盟主同上月燈神拗吓頸，睇吓讀者信邊個。