叱咤一向不怕政治表態，RubberBand昨日冧莊奪叱咤樂壇我最喜愛的組合，他們在欠缺隊長阿正下上台領獎，先是阿偉說：「過去一年好艱難，但我哋做咗一張好貴專輯，好多謝一班同我一齊發夢嘅隊友，大家毋忘初心，終有一日成功。」接着泥鯭說：「發夢咗好多年，繼續發夢落去，一定要多謝香港人，呢一年疫情失去好多嘢，疫情之下唔公義嘅有好多，但有希望下大家繼續，香港人加油。」主音6號感謝完唱片公司後，也向香港人說要加油，最後他激動說：「今日係我媽媽舊曆生日，佢當時仲喺醫院努力，雖然𠵱家佢已經喺天上，但仍然要祝福香港人同我哋嘅屋企人。」他們唱畢後，接着森美上台講了一句「多謝香港人嘅樂隊。」
昨日有不少因疫未能欣賞現場演出的網友於維基百科不斷更新頒獎禮資訊，但當宣佈完陳柏宇憑《感情這回事》奪得叱咤十大第八位後，有人發現叱咤頒獎禮的維基網上，竟然有第七位偷步公開，得獎歌曲被填上社運歌《願榮光歸香港》，主唱及編曲被填上「真香港人」，作曲、填詞及監製則是「手足」，惟至大會公佈關智斌憑《暫定》奪得叱咤十大第七位後，有關資料已刪除並更正。
當林海峰宣佈我最喜愛的男歌手前，與盧覓雪等合唱一首自創歌曲，其中唱到作為一個歌手，要聽教聽話孝順父母，明顯是寸周柏豪跪低。
而昨晚DJ出場頒歌曲獎，台詞好多都貼近時事話題，叱咤第五位由馮允謙的《地球來的人》奪得，余迪偉頒獎時表示，歌曲講地球不適合居住要搬到外星，希望香港人移民去到第二個地方居住，都可以講自己語言廣東話，就好像馮允謙都唱廣東歌。第四位由許廷鏗《無力感》奪得，謝茜嘉頒獎時則話：「近日因疫情限聚令，飯腳由六個到四個到兩個，甚至喺街上食飯都試過，其實任何一種無力睇唔到將來嘅感覺都係令人沮喪，不過若變成同行嘅號角聲合力自救，就係最有力嘅無力感！」