過去一年，全球受武肺疫情影響，香港娛樂圈不少工作叫停，前晚大除夕，在限聚令下，香港大型跨年活動近乎零，只有ViuTV自家製倒數節目「圍爐」派獎，無綫則聯合央視與內地網站搞跨年騷。反觀，防疫做得最好的台灣就熱熱鬧鬧，台北、花蓮和高雄等地相繼都有大型慶祝，有些活動更配合放煙花，而內地也搞了不少跨年騷，讓大家一齊迎接2021年。
武肺疫情下的除夕，香港大型倒數活動全面叫停，ViuTV前晚播出自家製的「2020 ViuTV金Bear圍威喂派獎典禮」，出席包括主持強尼、陳俞希（Hailey）及駱振偉，以及組合ERROR、MIRROR成員李駿傑（Jeremy）和王智德（Alton）、沈殷怡、陳欣妍、顧定軒、張進翹（Manson）、魏浚笙（Jeffrey）等，再加埋ViuTV吉祥物「生啤」，雖未算熱鬧，但勝在廣東話節目有親切感。
節目除陪大家倒數外，亦表揚出席藝人，不過就講明「圍威喂派獎」，得獎標準既不客觀亦沒有根據，純粹搞笑，一開始梁業（肥仔）獲頒黃金比例大獎，組合ERROR再獻唱《我們很帥》打頭陣。
沈殷怡和陳欣妍去年主持節目《美女郊遊遊》奪得最伏節目大獎，強尼笑說：「沈殷怡同陳欣妍喺《美女郊遊遊》嘅預告，憑住着泳衣行山吸引大量網民，但好可惜出街之後，着泳衣嘅比例係唔夠5%。」在《全民造星III》曾經以boy love（BL）演出的顧定軒和Manson得到最佳螢幕情侶大獎，兩人合唱《我們》，Manson說：「好多謝二汶嘅idea，因為要將BL劇擺上電視真係好大嘅突破，好多挑戰。」
Hailey憑節目《晚吹：空肚講宵夜》奪最佳食相藝人，而曾經霸佔三個黃金時段節目的強尼則獲老是常出現大獎，他在台上感言：「估唔到2021年嘅第一刻都係我出現，我希望2021都係繼續老是常出現。」肥仔、Alton和Jeremy憑劇集《男排女將》得到最佳後備獎。Jeffrey獲頒ViuTV最想據為己有藝人，他透露如疫情受控，MIRROR有望今年5月開演唱會。靈探真人騷《鬼同你上位》主持七仙羽師傅獲我最喜愛人物，她說：「我好擔心呢個係咪豬肉獎？因為我食齋㗎！」最後頒發「ViuTV星期日晚上9：30-10：30曝光率最高男藝人」由鄧建明（Joey Tang）拎走。
