睇番數字，目前全球有8千2百萬人確診，死亡人數超過1百80萬，美國最多人確診（近2千萬），最多人死亡（近35萬），特朗普在去年2月，仍然輕視病毒，不予理會，因為怕選情變壞而故意少理，又話4月會變好，不理專家意見，卒之因疫情不斷擴大而徹底破壞佢嘅選情。英國約翰遜又係當初唔理唔理，要到自己確診入ICU，救番條命之後先至認真處理，為時已晚。亞洲本來已在六月之時，以為已將疫情控制，點知第三季來一個大反彈，日本南韓告急，非洲國家窮，無西方新聞理會，但工業國家到處搶購疫苗，窮國得個睇字，根本在等上天打救，無法自救。試問歐美亞非四大洲皆有病毒入侵，況且病毒不斷變種，令到日本鎖國，英國鎖國，美國失控，我哋小小香港，每日有幾十宗不明源頭感染，教人如何可以樂觀，認為疫情在2021年會有好轉？
即使在中國大陸，聲稱已打敗病毒，生活恢復正常，但COVID仍是百足之蟲，死而不僵，各省零星爆發十宗八宗確診，習近平最緊張之北京城，12月26日發現5宗本土感染，北京市立即宣佈禁止群眾活動，嚴控進出北京旅遊，取消跨年音樂會等等，可知市委心裏有數，不敢聲稱控疫成功，更緊張到連一位網絡寫手李貴寶，涉嫌因在網上講幾句諷刺疫情，便被拘捕判監一年，罪名係「尋釁滋事」！
以此標準，香港專欄作家每日都「尋釁滋事」，若香港有此罪名，幾乎全部專欄作家都可以拉，包括屈氏潘氏罵林鄭！
一片悶局之中，梁振英系統之建制派，全面要求香港全民強制檢測，林鄭政府期期以為不可。點解不可？袁國勇近日講到香港除非有一萬個紀律部隊日日負責追蹤，一人孭住一個包，裏面有深喉唾液檢測瓶，見到可疑人物就叫佢檢測……。咁大陣仗！去邊度搵一萬個警察，或海關或消防或衞生署人員去做？一位醫學界人士對左丁山講，袁教授其實係暗示全民強制檢測係「堅離地」，不切實際，不知執行方面好困難！袁國勇講咁多嘢，難怪建制派恨他得要死。一位醫生講笑話，假如建制派反林鄭得逞，政府嘅防疫專家顧問會改為高永文，周伯展，林哲玄喎！