【名家足路】
【對決場次︰史特加vs RB萊比錫】
踏入2021年喺一燈決呢個專欄再同大家見面，首先祝大家新年快樂，新一年逢賭必贏。世事就係咁奇妙，小弟事隔只係一個月，就由11月燈神榮升一哥同大家分享貼士，亦叫做喺2020年攞番個尾彩，喺呢度都想藉此鼓勵吓今個月升番班嘅筋肉人，可以好似小弟咁寫下一篇勵志嘅故事。
入番正題，今次同尊嘉對賭嘅係德甲，小弟自認德國波肯定熟過呢位新出爐嘅燈神。佢睇好RB萊比錫歇冬後會即贏，我就投今年令人眼前一亮嘅「升班馬」史特加一票，主場受讓半/一，開下盤機會高。RB呢隊波近年經常都係上半季係威係勢，下半季就底氣不足大跌Watt，上年就係咁，明明歇冬前做咗冬季一哥，點知下半季係咁失分，最後輸畀拜仁慕尼黑就正路，連個第二位都保唔住就真係有啲失禮。
雖然RB嘅教練尼高斯曼係有料到，但總覺得前線冇咗迪姆華拿後，有時隊波前線唔夠銳利。睇吓歇冬前主場對科隆場波，全場14次射門有6球中框，多過科隆三倍有多，但最後場波0:0收場，我覺得今場對住之前曾經炒過多蒙特5:1嘅史特加有難。
史特加有咩勁？佢哋隊波打反擊好快，對住今年防守麻麻、好多時踢三後衞嘅RB，應該會搵到好多空間入楔。雖然之前好有爭議嘅首席射手華曼基杜卡因為膝傷要避戰，但曾經係奧地利U21小國腳嘅沙沙卡拉積錫同阿根廷前鋒尼高拉斯干沙利斯，都係射術唔差嘅球員，隨時偷到雞。
文：盧卡東尼
《一燈決》係今季新欄目，由上月擂台盟主同上月燈神拗吓頸，睇吓讀者信邊個。