踏入2021年，2020年絕對係令香港人感到難忘嘅一年，而為港人帶嚟無數憤怒嘅777，就喺facebook叫大家歲晚停聚，睇旅發局除夕倒數喎，完全冇打算同市民回顧一下「難忘」嘅一年旅程，作為特區政府首長，除夕點可以咁隨便？就等八方協助777，回顧一下一年來佢幾單「精采表現」啦。
要數最影響全港民生經濟嘅固然係武肺，777可謂將香港入掟入一個又一個嘅圈套。首先係來自中國嘅圈套，雖然林鄭自稱「迅速應變」，不過直到2月，777仲呼籲緊公務員「口罩戴咗都要除返」，就算有人由武漢帶毒來港、醫護罷工求封關、民主派叫極佢都唔聽，仲話封關係助長歧視內地人、罷工醫護係「害群之馬」喎，結果香港爆完一波又一波疫情，百幾條人命，害群之馬係邊個？
猶記得5、6月時疫情回落，林鄭急不及待放寬限聚、限枱令，最大鑊係畀唔同行業人士豁免檢疫來港，結果由機組人員同海員群組將病毒散落社區，事後777受訪，講到事不關己，「有些政策在執行的過程裏面，執行得不太完善，總出事」。香港第三波疫情有4,090人確診，97人死亡，777唔單止道歉都冇聲，仲繼續兜：「不少海員出了海半年也不能泊岸，基於人道理由豁免抵港海員檢疫。」睇嚟香港嘅人命就唔算人道理由嘞。
年頭《蘋果》踢爆777寫畀北京嘅篤灰小報告，內容狀告建制派令佢處於四面受敵的困難時刻，罷工醫護就變咗「借機鬧事的激進反修例分子」，將政府施政失利賴落自己人度！之後賴民主派喺立會拉布，叫北京出手DQ民主派四名立法會議員，搞到民主派總辭，立法會變建制天下！不過777開心唔夠一陣，就畀建制派喺立會插佢抗疫不力，似係要報「被篤灰」之仇！
要講政治，少不了777撐國安法擦北京鞋，佢為咗訪京仲推遲年尾嘅《施政報告》，向京官爭取通關同「惠港政策」。但佢無情情話要訪京，北京要開五中全會，得鬼閒理佢？到後來見到京官啦，又冇「14日清零」畀人睇，要人通關真係睬你都儍，至於惠港政策，原來都係與大灣區建設共融發展嗰味嘢，到年尾佢仲俾北京押後述職冇得見習總！
777又不忘大打同情牌：「有時有質疑自己決定的孤單時刻。」不過對於美國制裁，就表示信中央唔驚，話自己成屋現金、好榮幸，「又回到以前的我了，是吧？」
李八方