【爆相爆片】
現年31歲的林作與32歲裕美在昨日除夕驚爆婚訊，一對新人昨日凌晨踏正12時穿上婚紗禮服，於林作的半山豪宅內透過視像電話，於美國猶他州進行網上結婚登記及簽紙，裕美母親和朋友在場見證。據知今次婚禮林作是瞞住母親Lily秘密進行，身在內地的Lily昨日接受本報訪問時，驚聞兒子婚訊後激心表示不接受︰「如果係真，我會當冇咗個仔。」
林作與裕美昨日爆閃婚，《蘋果》昨日收到讀者陳先生透過「爆相爆片」分享，指林作與裕美在昨日凌晨12時，於林作位於半山麥當勞道的豪宅舉行婚禮，兩人在美國猶他州的網上登記註冊，並透過視像在海外律師見證下完婚。據知婚禮相當低調，現場只有裕美媽媽、十多名朋友出席，林作更是瞞住一直反對他與裕美拍拖的媽媽，趁對方身在內地自行舉行婚禮，先斬後奏。
婚禮簡單而隆重，裕美穿上開胸簡約的婚紗，林作身穿筆挺西裝配煲呔，禮成後二人甜蜜咀嘴。據悉林作決定閃婚，是因為去年9月與媽媽Lily上開電視的玄學節目《搵陣》，蘇民峰指他去年及今年是結婚最佳時機，否則就要拖到10年後。林作為免夜長夢多，於是不理母親反對閃娶裕美。鬼馬的他昨日更在fb上載西裝單人相，留言：「I am ready for tonight.」刻意將時間拖延。
《蘋果》昨日致電林作，對於瞞着母親與裕美結婚，他聽罷反應甚大說：「邊個講㗎？冇啲咁嘅事（結婚），我哋呢幾晚開party之嘛！」問為何會穿婚紗和禮服，他解釋：「我哋做嗰行（保險）就收爐，同啲同事開dress up party咪着成咁，呢幾晚都有人玩truth or dare，輸咗就話要畀幾張相《蘋果》登整蠱我，我估有人有心做我！」他堅稱前晚並無律師在場作見證：「冇律師，係都係我啫！」林作連番否認結婚，但問到美國登記結婚，他終於承認︰「我哋係有登記，不過都係玩吓啫，只係表達愛意嘅行為，總之我呢一刻喺法律上係冇結婚，亦未有結婚計劃。」
裕美接受訪問時，與林作口徑一致：「邊個話？吓，完全唔知發生乜事。」後來稱只是開派對，問到為何穿婚紗，她牽強地說：「都有着嘅，但唔係結婚。因為我攞嚟影相，人哋送嘅，但唔係林作。」問到是否有計劃結婚？她說：「阿作成日都話感覺好似結婚咁，但佢𠵱家講嘢我都唔係好信，因為佢太叻講嘢。我冇乜所謂，又唔係未結過婚，雖然我都好想有個完整家庭，但順其自然啦。」問是否擔心林作母親反對才低調進行？她說：「我都希望伴侶嘅屋企人喜歡我，但呢啲冇得逼，基本上我哋（與林母）唔係好熟。」對於被指裕美媽媽都有在場作見證，她解釋：「佢哋成日上嚟開party，媽媽經常嚟探我。」
身在內地的Lily昨日回覆《蘋果》時說：「佢（林作）都係玩嘢，帶畀大家娛樂開心啫。」但得知林作與裕美有結婚相後，她強調不可能接受裕美，激心地說：「佢今晚準備做直播交代事件，否則我會同佢死過！如果係真，我會當冇咗個仔啦，斷絕母子關係，新年畀份咁大禮物我，激死！」
林作2017年與麥明詩分手後，同年尾跟失婚裕美出席麥玲玲飯局認識，林作對裕美一見鍾情，有傳他不惜撬牆腳，令裕美與外籍男友Alex分手。前年1月，林作與裕美被拍到遊日本，當時已傳兩人撻着，至去年6月兩人被《蘋果》拍得拖手斷正，終於認愛。林作舊愛麥明詩昨日僅以短訊回覆：「送上祝福。」
