有線新聞台月初大地震，40人被裁，觸發多位記者、採訪主任辭職，有線中國組更加總辭明志，成組人做埋今日就正式離開，代表住有線新聞一個時代嘅終結。
不過，唔代表舊有線新聞嘅班底同埋快樂新聞部就此四散，一班有線新聞嘅前員工、就快離開嘅員工，日前喺facebook成立咗一個專頁，叫做「Cable同學會」，記錄呢個新聞部嘅點滴，仲搵埋有線好多猛料舊人撐場。
呢個專頁邀請曾經喺有線新聞部工作嘅人，以文字、相片、影片分享佢哋喺有線工作嘅回憶，專頁亦邀請咗一班有線人訪談，暫時雖然未有野睇，但單係介紹專頁嘅短片亦已唔嘢少，邀請咗好多有線嘅前同事亮相同埋講咗幾句，包括有香港有線寬頻主席特別助理趙應春，佢仲彈咗幾下有線嘅台歌《開創無限》，仲有前有線前高級記者吳婉君爆採訪主任曾楚群嘅上位之謎。
至於片入面有亮相嘅其他面孔，仲有去咗做學者嘅中國組前首席記者呂秉權，退咗休嘅有線中國組中國駐廣州記者站主任林建誠，有線新聞部前高級副總裁黃餘發，首席記者楊量傑、體育組前主播兼記者嘅林定勤，而「Cable同學會」頭炮就會由有線中國組總採訪主任司徒元講述有線新聞嘅價值同埋中國組總辭嘅因由，八方好期待快啲有得睇。
李八方