利物浦喺新球季慘遇傷兵潮，尤其後防位置傷情特別嚴峻，所以紅軍特登請咗曾經同領隊高普合作無間嘅康復表現及治療專家安治亞斯返嚟幫手。有球迷就講笑話請咗新專家嘅話，中堅華基爾雲迪積克（VVD）係咪可以提早喺今季復出。
紅軍兩名正選中堅VVD同祖高美斯喺季初受傷，預計要缺席今季所有賽事，利物浦禮拜日英超主場1:1賽和西布朗一仗，再有祖爾麥迪比鼠蹊受傷，令本來就唔夠人用嘅防線雪上加霜。因為咁，令曾經喺多蒙特同高普合作過4年嘅54歲康復治療專家安治亞斯，就同呢位德國領隊有機會再續前緣。呢位專家曾經做過多蒙特、拜仁慕尼黑、慕遜加柏、史浩克04等嘅醫療主管，經驗相當豐富。利物浦希望安治亞斯可以幫到紅軍解決傷兵問題，跟進球員受傷康復、醫療同埋球場表現嘅工作。
利物浦禮拜二朝早喺twitter宣佈消息後，有球迷就搞笑咁話，如果安治亞斯可以協助球員盡快康復嘅話，短期內就可以升官發財，甚至希望佢可以令收咗「咧」嘅VVD喺今季復出：「當你要特登請個康復治療專家嗰陣，就知隊波嘅傷兵問題有幾嚴重。」、「即係話VVD今季可以返嚟啦。」
