早前尋求賣盤嘅星島新聞集團主席何柱國日前被入稟追數，金額高達1.5億，債主係利福國際主席「細劉」劉鑾鴻。入稟狀冇透露詳細背景，只係話何柱國開出嘅支票彈票。八方打電話畀何柱國查詢，佢一聽到記者身份之後就即刻cut線。
入稟狀話，何柱國向細劉提供一張日期為今年10月26日嘅支票，支付1.5億港元。細劉11月11日就入票啦，點知彈票喎。細劉之後出律師信，但何柱國截至前日一毫子都冇畀過。
疫情打擊，行行都勒緊褲頭，過去一年好多富豪都收到求救撲水電話，或者有啲本身都危要去撲水。事件中兩位主角何柱國同細劉嘅公司又點呢？噚日股價變幅唔大，星島升3%報1.03元，利福升0.17%報6元。兩個集團業務都飽受疫情打擊，上半年錄得虧蝕；其中星島領取咗半億保就業資助，年內減薪節流，近日安排員工每月放四日無薪假，為期三個月。
案件編號：HCA2172/20
李八方