克羅地亞中部禮拜二發生咗次黎克特制6.4級嘅強烈地震,造成多人傷亡,喺俄超踢緊辛尼特嘅洛夫雲見祖家有難,就嗱嗱聲宣佈開放佢名下嘅一間酒店收容災民,再次成為國家英雄。
今次地震嘅震央喺克羅地亞首都薩格勒布東南面城鎮彼得里尼亞附近,由於震源深度只得10公里左右,屬於破壞力較強嘅淺層地震,所以鎮上有多間建築物倒塌,隨住挖掘瓦礫嘅工作展開,傷亡數字亦不斷上升。曾經協助克羅地亞殺入2018年世界盃決賽嘅洛夫雲,就決定再次化身國家英雄,開放佢位於諾瓦利亞嘅一間酒店,收容部份無家可歸的災民。
諾瓦利亞係克羅地亞西部一個旅遊城市,距離彼得里尼亞大約270公里,洛夫雲喺市內擁有間有16個房間,叫Joel Hotel嘅度假酒店。呢位31歲中堅就話,希望可以收容目前情況最困難嘅16個家庭,帶住細路仔嘅災民將會優先獲得接濟。外電報道話,呢間酒店平時閒閒地都要200美金1晚,即係成1,560蚊港紙,洛夫雲為咗幫人而有生意都唔做,認真唔話得。
洛夫雲話見到一班同鄉經歷呢啲恐懼,覺得個心好唔舒服,佢除咗同大家打氣之外,仲幫彼得里尼亞嘅災民祈禱。洛夫雲喺ig分享佢嘅善舉後,得到唔少球星同球迷嘅支持,仲有人大讚佢係全世界最出色嘅後衞。事實上,雖然長年出外搵食,但洛夫雲一直都好關心克羅地亞嘅情況,聽講佢效力利物浦嘅時候,就曾經大嗱嗱捐咗成80,000美金(約62萬港元)畀祖國嘅慈善團體,幫助當地嘅兒童。除咗洛夫雲之外,同樣嚟自克羅地亞嘅車路士中場高華錫,亦都打算透過自己名下嘅基金,為祖國出一分力。
其實球壇入面都有幾多酒店大亨,當中亦有唔少同洛夫雲一樣咁抵得諗,曼聯名宿加利尼維利喺年初疫情啱啱全球爆發嘅時候,就曾經將旗下嘅奧脫福足球酒店(Hotel Football)同證券交易所酒店(The Stock Exchange),免費開放畀醫護人員入住。疫情越嚟越嚴重嗰陣,都傳過基斯坦奴朗拿度會將自己喺葡萄牙里斯本同馬德拉嘅兩間Pestana CR7酒店,改裝成臨時醫院,不過最後發現只係假新聞。