細行再現拆佣拆九成，沒有在大行搵食的自僱地產代理如果好彩有刁，一般搵細行出單，佣金拆賬一般五五分賬。但當地產市道進入冰河時期，拆賬比例就寧舍唔同。最近已經收到一些細行提供拆佣七成半，甚至九成的情況，即是一單刁佣金10萬元，拆賬後，經紀個人淨袋由以往5萬元，現在上調至7.5萬元，甚至9萬元。細行提高拆佣比例，無非是吸引更多經紀來出單，希望拆到數，頂住間行，但當中有冇伏？失業率上升，不少人考地產代理牌，甚或把雪藏中的牌照重見天日，這批不是長期從事地產代理工作的經紀好日唔見有單開，如果好彩有朋友提供租樓或買樓交易，就透過細行出單，賺得幾多得幾多。另外，市道差交投少，有些經紀唔夠數，以往每月一、兩張單，現在慘到兩、三個月才有一張單，就飛單到這些細行拆高佣維持生計。拆佣拆九成的細行，無非都是因為生意差到瀕死邊緣，盡地一煲。這些細行的出現，有時是有些經紀幫某投資者交易多，熟絡後遊說其投資開設代理行，對於投資者而言可視為樁腳拎筍盤。市道差，拆佣拆九成，代理行賺一成，間行咪蝕死？係㗎。但這些代理行目的皆在做靚盤數，遊說投資者繼續泵水，而且收得回來的刁都是濕碎細碼刁。但細行拆佣大幅上調亦反映地產市場非常差，尤其是工商舖市場。
小師兄