武漢肺炎疫情橫跨整個鼠年，娛圈停擺，明天踏入新一年，不少藝人明星對2021年寄予厚望，《蘋果》邀請到堪輿學家麥玲玲，預測2021辛丑牛年娛樂圈的走勢，更會點出哪些「大利」哪些「不利」，同時亦請到南昆山正一教「奇門遁甲」嫡傳人雲文子師傅，預測藝人新一年的感情運勢。
撰文：翁可人
展望牛年，玲玲師傅指歌、影、視未必有顯著改善或進展，相反在疫情下，藝人的另類收入更為可觀：「牛從來比較勤力，下年娛樂圈都會衍生咗好多唔同嘅做法，兼且財星到，多多少少代表一啲商業嘅嘢，好多朋友做緊啲藝術前線嘅嘢之外，會做一啲生意或者喺網站賣嘢、帶貨，牛年代表勤奮努力就會有唔同嘅機會。」
牛年娛樂圈運勢會較鼠年佳，玲玲師傅指尤其小品式電影更會被睇高一線：「因為有財星到對宮，即係以口搵食嘅行業或者做前線嘅人會好啲，就算電影行業都會好返啲，不過唔會係大片當道，反而係小品式，好似文藝片或者成本低嘅愛情小品，容易勝出。」
每年若干生肖犯太歲或沖太歲，玲玲師傅指都是小事，藝人最驚是合太歲，今年肖鼠的藝人要多加留意了：「喺牛年裏面，屬牛、屬羊、屬龍、屬狗同屬馬都係犯太歲，不過藝人嚟講，唔係好怕犯太歲，本命年屬牛容易情緒低落啲，屬羊係相沖年，但唔怕，因為娛樂圈一沖反而係沖喜咗，容易攞獎。其他犯太歲朋友只需要留心是非口舌就冇問題，反而屬鼠合太歲最多問題，會有負面新聞，亦容易傳出唔好消息或者做起嘢上嚟一波三折，所以屬鼠最好多啲走動、結婚、添丁同買樓都得。」1972年出生的鄭秀文（Sammi）、陳慧琳、鄭中基、古巨基及杜汶澤和1984年出生的周柏豪等藝人都是肖鼠，看來牛年要特別小心。
牛年不同年齡層會有不同際遇，玲玲師傅指：「西南坤位代表媽媽輩嘅人係有三碧是非運，容易同人嗌交，即係喺呢個圈做咗媽咪嘅藝人，係是非比較多，同人容易有拗撬，而爸爸輩都係麻麻哋，有少少失運，反而最理想嘅係後生女，搵錢機會高。另外，後生仔同中年男仔都係唔錯，30幾、40歲會好少少，甘草或者年紀大少少嘅朋友就會麻煩多啲。」
名字有木字的藝人，玲玲師傅也特別提點在牛年要多加留意自身安全。「牛年係辛丑年，天干係金，地支係土，逢係名字入面含木，例如姓楊、姓李或者名字多木多草花頭嘅朋友，由於受到金克制，金木相剋，容易受傷整親、扭親，要特別小心，相對如果你本身個名已經金旺嘅，譬如姓劉、姓鄭或者名字入面比較多金嘅朋友，今年叫做入運，會較容易出名。」
不少藝人有閒錢都喜歡做小生意，不過據玲玲師傅所講，藝人命格其實不宜搞生意，勞神傷財忙完一輪隨時得個吉。玲玲師傅表示：「藝人多數係傷官食神格，即係用名氣去搵錢，但唔代表做生意特別叻。藝人只可以做一個中間人角色或者掛名做生意，當你真金白銀做生意，好多時呢啲命格會容易蝕錢，今年尤其係屬老鼠合太歲年分、屬牛本命年或者羊嘅相沖年，更加特別要小心，因為真係好容易唔見錢㗎。」
玲玲師傅最後教大家催吉避凶，藝人最緊要是有觀眾緣，即所謂桃花運，想要催旺觀眾緣，牛年要在正南方位，亦即桃花位置擺放多些鮮花或者顏色鮮艷的物件，自然會吸納更多fans。
至於財位，玲玲師傅說：「正西呢個位置，可以放多啲大葉嘅植物或者水種植物，會對自己事業好好多嘅。一般藝人都比較多是非口舌，是非位牛年喺西南位，呢個位盡量唔好放綠色嘅嘢，因為是非位係屬木，水木相生，見到水、綠色都係唔得，最好放紅色嘢，木生火，放一啲揮春或者放盞紅色嘅燈，都可以化解是非或官非。最後係名氣運，如果想加強可以喺正東呢個位置擺放四支富貴竹，代表步步高陞同名氣都會比較旺㗎。」
