本港歷史性成為美國制裁的主角，銀行界度過驚險一年，國務院向國會提交報告後數十日，業界火速與目標官員斬纜，算大步檻過無落入二級制裁，不過未來暗湧仍浪接浪。大和資本市場執行董事兼首席經濟師賴志文認為，「首回合」看似輕鬆檻過，新一輪制裁名單卻隨即拋出，「好似玩緊跳高跨欄運動」，難度不斷加高，美國取消香港特殊待遇地位，對本港國際金融中心的深層影響，未來一兩年亦會浮現。
外界對特朗普簽署「香港正常化行政命令」，多解讀為只涉貿易及關稅層面，「其實係一個重要轉捩點」；賴志文指按例美國政府會用一兩年時間，待每個部門檢視完那方面需要斬纜後，屆時考驗才會見到，包括美國與香港一眾金融監管機構關係、港企在美上市地位等會否出現變化，需要關注。
不少歐美國家已停止與本港實施逃犯引渡協議，賴志文說，「如果冇晒引渡協議」，好多現有金融監管條例便形同虛設，「將來等於有人犯咗某條金融條例，離開香港去到呢啲國家就冇事」。
美國民主黨在大選後未能控制兩院，未來拜登政府很可能是跛腳鴨，兩年後國會中期大選又到，「唔想輸，對華政策唔可以放得太軟」；當前新班子或忙於政權交接，但最多60日後（明年2月初），銀行又面對另一趟次輪清單威脅，拜登如何拿揑制裁措施，「下一個限期係好重要啟示」。
過去一年半，本港政治環境風高浪急，資金卻源源流入無淨流出，不敗之謎在於港息低但美息更低，「的確係有廣大市民搬錢去開離岸戶口」，但外圍水浸，港息只需高於美息0.01厘，都足夠吸引銀行套戥。賴志文指暫看不見形勢逆轉，「除非出現黑天鵝事件」，規模不小的銀行被二級制裁，才可能令套戥失效觸發資金淨流走。
作為中環金融人，事事講求風險管理，有否開定離岸戶口？賴謙稱自己可調撥資產非常少，「但身邊認識嘅朋友，唔同背景唔同光譜，絕大多數都做定同一準備……真係有甚麼巨大變化，幾分鐘內撳粒掣就做到（調撥資金）」。國安法實施後，分析師是否也要更口密？評論作風較敢言的賴志文笑說，「冇乜大改變，盡量喺有限空間作無限發揮」，隨後又補充一句，「始終有條法例，都會望住留意番」。
■記者劉美儀