2020年，我會稱之為「震撼年」，中美關係、武漢肺炎、香港政局、全球經濟，一環扣一環，每個「震撼彈」都令我諗，「乜原來可以咁？」
畢菲特活了89年，見證5次美股熔斷，但我實在估唔到，呢5次都喺我有生之年。美股熔了又斷，疫情根本未好過，但咁嘅情況下原來可以炒到癲。油價又原來可以跌到負數，2,000萬桶原油喺海度hea，然後原來ETF竟然可搬龍門避爆倉。最令人驚嘆係，香港油站油價仍然企硬。
年頭滙豐銅獅被火燒，發現原來真係風水獅，邪到一個點，銅獅一入箱，就算金融海嘯都堅持派息嘅滙控，原來真係可以唔派息；邊個又會估到，一場疫情，國泰幾乎要執笠，連機師都要落地送外賣。
港交所突然成為美國上市中概股難民營，新股一隻接一隻，真係又要講一句：「要不是香港……」但原來當香港做緊中概股難民中心時，香港人都有做難民嘅一日，要其他國家通融收留。
年頭大家喊住排隊買口罩，反而刺激香港重振工業，口罩生產線遍地開花。香港人走位之快，真係唔可以睇少。講香港典型醒目仔，王維基是經典，港視（1137）早幾年被打壓，轉型網購被睇死，最終一場疫情，令佢完全入屋。100億對35億市值，港視原來真係可以拋離TVB！
過去年半，令大家真正感受原來言論自由可以唔係必然，中國地產大亨任志強因為講錯嘢，可以突然身陷牢獄，喺中國網絡上完全消失。強大如馬雲，原來亦可以純粹唔畀面「目中無人」，螞蟻上市被煞停。對內處處亮劍，但原來對外就搞笑，對美國都唔講了，中印邊境明明戰事不斷，但轉個頭就同印度做生意，30年來首次印度進口大米。
一個又一個嘅「原來」，話畀大家聽冇嘢係冇可能嘅。2020年仲有兩日，十年前國務院正式通過的「2020上海超越香港，成為國際金融中心」又有可能嗎？官方智庫最近發報告：「2035年上海建成與紐約和倫敦並駕齊驅的頂級全球金融中心」。原來上海要超越香港大計，推遲了15年。
千頌C