【姐匙Talk】藝人開工高層暗令可免罩

武漢肺炎一波未停一波又起，全港都要謹慎防疫，不過唯獨一間機構表面扮到好嚴厲，實質最鬆懈，開工時只係戴個透明膠口罩，已經立咗超壞榜樣，有資深演員爆料，入邊嘅高層係講一套做一套。藝人要出外景拍嘢，俾人多次影到唔戴口罩四圍傾偈，其實係有原因，因為𠵱家最着重嘅節目，即係成日叫人返屋企嗰個，佢哋嗰班演員就基本上日日都喺公司打躉，但係由於佢哋要日拍夜拍，高層其實暗中有落命令，叫佢哋唔使戴口罩，因為口罩又除又戴就整花啲化妝，唔連戲就會影響拍攝進度。

潮州驚領嘢

本來呢啲命令都係指拍嘅時候，不過入面一班後生演員，就變咗奉旨咁，喺公司完全唔戴口罩就四圍走，除咗搵人吹水，去買飯去廁所，都冇諗過要戴返個罩，久而久之，成班人都覺得自己係神仙，係得佢哋唔會傳染到病，防疫意識好低，所以有個阿哥級嘅「潮州」，就死都戴住個口罩，因為佢知道同場啲人好高危，只要一個領嘢就會全部領嘢。

Jessie聽啲行家講，平時去採訪可以四圍走搵藝人訪問，𠵱家就有人睇實，只可以去指定地方，好似去咗北韓咁。而且大家覺得呢間機構係借抗疫為名，背後其實係考慮政治因素。

撰文：Jessie

本欄逢周三刊出

姐匙Talk

我姐匙縱橫歌影視幕後，多年嚟冷眼旁觀，娛樂圈大小事都走唔過我雙眼，歡迎大家嚟剝花生。