武漢肺炎肆虐全球，唔多唔少都係因為一小撮自私精，為求玩樂疏於防疫，好似香港早排嘅跳舞群組咁。唔知係咪以為自己已經中過招就以為可以免疫，一向貪玩嘅巴黎聖日耳門（PSG）球星尼馬，呢幾日就喺巴西祖家開大P，由聖誕一直玩到新年，聽講仲有500人參加！尼馬就梗係例牌唔認，但自稱負責籌辦活動嘅公司就承認秘密派對嘅存在，但就話只有150個賓客，我求大俠話知你500定150人啦，總之就好多人囉！
尼馬爛蒲爛玩係人都知，但𠵱家全球疫情嚴重成咁都唔識死就真係抵鬧。巴西傳媒O Globo早幾日收到風，話尼馬喺聖誕到期間，喺自己位於里約熱內盧曼加拉蒂巴嘅超級豪宅入面，搞咗個狂歡大party，出席人數估計有500人。消息話派對嘅保安好嚴密，尼馬除咗喺大宅範圍加咗隔音設備，以防鄰居投訴外，所有賓客仲要喺入屋前將手機交畀保安，防止有內鬼或者係有人唔生性，懶叻咁po相同片上社交網站，實行「寧俾人知、莫俾人見」。
事情曝光後，唔少人都批評尼馬漠視防疫規定，嚴重威脅公眾安全，而佢嘅代表就例牌唔認搞咗個500人嘅派對。不過，活動籌劃公司Fabrica就出咗份聲明，自認係party承辦商，強調尼馬呢個派對只得150人，純粹係私人性質，一定會嚴格遵守衞生當局規定，仲言之鑿鑿咁話已得到各個相關部門許可。
巴西CNN就指，其實當局冇正式收到有關派對嘅通知，又話如果有團體要搞個有成500人嘅活動，事前應該要同市政府講聲。報道又引述一個當地官員話，當局唔可以吓吓都就住特定活動立法，但如果尼馬真係喺曼加拉蒂巴開大P，就肯定會對抗疫工作有損害。英國《每日郵報》都曾經就呢件事向尼馬嘅新聞官求證，但就冇獲得回覆。
巴西係武肺疫情最嚴重嘅國家之一，至今已經有近750萬宗確診個案，死咗超過19萬人，而尼馬喺今年9月亦中過招。巴西傳媒就批評呢位28歲球星，喺咁嘅環境下仲掛住玩，做法極之唔負責任。另外，PSG方面傳足六日後終於官宣炒咗杜曹，有傳前熱刺主帥普捷天奴即將接任，唔知佢又會唔會教吓尼馬呢？