自從中國同美國關係緊張，加埋反送中運動後，北京喺香港立國安法對付外國勢力，連政黨人士、立會議員見外國領事都可能出問題，美國駐港總領事史墨客冇再好似佢前兩任嘅唐偉康、夏千福咁，成日喺fb貼落區同香港人交流、四圍睇嘢食嘢嘅相，不過史墨客都唔係完全唔出去外面行吓，睇吓香港景色嘅。
好似噚日史墨客就喺美國駐港總領事館fb專頁，貼咗啲佢去心經簡林行山嘅相，史墨客仲話自己一直都好鍾意大嶼山嘅景色，佢今次行山終於嚟到心經簡林，仲令佢認識《心經》多咗！雖然話史墨客係美國人，但八方相信佢話睇過心經簡林，令佢認識《心經》多咗並唔係隨口講，因為佢做過美國駐上海總領事、又喺美國在台協會做過，而且佢仲精通中文，有研讀《心經》一啲唔出奇。
李八方