艱難傷感嘅2020年即將告別，相信唔少香港人都會覺得呢年將成為香港歷史上嘅分水嶺，而年尾流流，仲有一件事提番我哋香港曾經嘅美好，就係一個原本俾人遺忘、埋咗喺荔枝角公園地底下面超過廿年嘅「文物時間囊」，終於可以出土，不過市民暫時冇機會睇到入面嘅嘢。
呢個「文物時間囊」係1999年臨時區域市政局同臨時市政局嘅賀千禧年活動，當時預咗喺2020年打開，但其後前特首董建華出手「殺局」，取消兩個市政局，呢個時間囊就變成孤兒仔，冇人理冇人問，點知呢個幾乎俾人遺忘嘅時間囊，近期有人重提舊事，話個時間囊定係2020年出土，但又唔見政府有反應，到2020年剩番三日，先有政府部門起返出嚟。
兩局早已被殺，自己仲早過時間囊成為歷史，咁出土由邊個負責？原來係康文署，康文署就事先聲明因為疫情關係，為免人流聚集，唔會安排開啟儀式，會適時取出時間囊喎，所以有啲噚日一心到場見證嘅市民同議員都好失望。點知當市民散去之時，康文署喺下晝兩點突然派人到場開工掘地，最後個六角柱體、有一個成人身軀大小嘅時間囊終於重見天日，但轉頭就被署方人員拎走咗。康文署就話，會檢查文物時間囊內存放物品嘅狀況，稍後會公開展示，但詳情要再作公佈。
咁有乜嘢放咗入時間囊放咗？當年記錄就包括前兩局嘅年報、千禧年活動紀念品同一班前議員自選物品，另外仲有前臨區局各大會堂同文娛中心當時最後出版嘅文娛節目表、仲有臨區局徽號同臨市局領帶等。有現場見證時間囊出土嘅市民曹先生話，香港呢20年急劇變化，真係講起都傷感，因為香港唔再係以前嘅香港，越來越陌生，仲話時間囊入面其中一件「文物」係基本法，真係非常諷刺，因為基本法𠵱家係任佢鍾意點改就點改喇！
李八方