最近不停有建制派同前特首梁振英嘅友好批評特首林鄭月娥同港府抗疫不力，政界解讀為有人為下屆特首選舉搞搞聲勢，民建聯創黨主席曾鈺成噚日做民建聯2020年度漢字選舉嘉賓，佢介紹年度漢字時候提及林鄭，表面似讚林鄭，但有人覺得似單打緊777！
至於曾經被視為特首黑馬嘅曾鈺成，就話自己係退休人士，無意再選特首，但就唔肯講支唔支持777連任，當中有乜玄機？相當耐人尋味。
曾鈺成噚日揭曉民記年度漢字係「安」字，佢解說時話「安」字係巿民最想要嘅嘢，又話未必一定話我哋香港已經實際情形係咁，仲講笑話「安」字寓意屋企裏面有一位女性，就安樂、就安全、就安定，之後仲話：「我哋香港都係啦，我哋有位女士做我哋嘅特首，咁我哋咪安樂囉！我哋抗疫亦都有一位女局長，都希望佢畀到我哋平安、安全。」有政界中人睇到呢段，就話薑係老嘅辣，曾鈺成呢句表面隻隻字都係讚緊777，「但香港人睇到，就覺得佢好似講緊反話，好似係隻隻字單打緊777過去一年令香港人唔安樂。」
咁曾鈺成又會唔會選特首？佢話自己最合適參選特首嘅日子都過晒，目前佢只係退休人士，至於佢支唔支持林鄭連任，曾鈺成就話言之尚早，仲講就算去問林鄭本人，恐怕佢都答唔到係咪連任到，言下之意似乎北京仲未有表示，唔怪得建制各路人馬咁「關注」777抗疫唔掂！
李八方