世上沒有無緣無故的恨，反送中運動爆發後，投考警隊人數急跌，八方早有聽聞連毅進畢業生都恥與一班「毅進仔」為伍。同樣情況亦發生喺輔警身上，不過輔警高層就搵到「亮點」唱好，話整體投考人數不跌反升。八方睇真啲，所謂不跌反升，原來係收多咗中年人，仲連51歲都收做輔警，唔怪得不跌反升！
其實之前popo已經因為後生投考人數跌，所以吸納30歲以上人士，點知輔警仲勁，據佢哋講平均投考年齡仲升到40歲，仲話有個51歲人士體能一take過，簡直為一班失業中年人迎來「第二春」！輔警方面解讀，投考人數上升令人振奮，仲話相信投考嘅人有志「守護呢個家」，但點解30歲以下投考人數暴跌？官方就轉身射個三分波，話係年輕人對警隊有誤解喎。八方覺得世上邊有咁多誤解，不如面對現實，年輕一代人已經唾棄警隊，不如畀心機級吶60、70歲「精英」啦。
八方明白各行各業都受武肺摧殘，先排失業率更創2003年SARS後新高，喺4月至7月呢段企業裁員潮，輔警逆市請人，最低級警員時薪起薪點高達101蚊，日薪可高達800蚊，咁嘅絕世筍工去邊度搵？有網民心水更清，做輔警可留住份正職，做定兩手準備公司炒人，而且輔警工作性質唔使用腦，分分鐘好做過看更。又有網民反問如果咁鍾意點解唔做全職警察呢？
李八方