現年42歲的林雅詩於2015年跟出軌前夫離婚，近年跟經理人馬天樂撻着發展地下情長達三年，但今年5月男方被踢爆三年前已偷食女助手Ana，兩人更疑似育有一名年約兩歲的兒子，有指林雅詩因再遇賤男深受打擊，更一度情緒不穩，出席活動時更爆喊。
林雅詩前日在微博留言，聲稱有人威脅她︰「小三對我講，『需要我把你的對話微信公開分享嗎？唔好再將你們的事圈在我身上！』真好笑，你色誘個男人要佢去食死貓，三年搞完一大輪，𠵱家同我講唔好再將我哋的事圈在你身上？甚麼道理？偷我電話偷我資料，然後威脅我分享公開？我都未報警你偷嘢。」其實，林雅詩於上星期在微博曾提過Ana，當時她留言︰「如果我有事？有兩個人要負責！Ana Chang and……」至於另一人是誰，她則沒有提及。
昨日《蘋果》致電林雅詩了解，林雅詩指有人對她說︰「佢叫我唔好做咁多小動作，唔係就公開我嘅留言。」林雅詩表示與前男友馬天樂已分手差不多半年，但礙於工作關係仍有聯絡，並不知男方與Ana現時的關係，她說︰「佢哋𠵱家係乜關係，仲有冇一齊，我都唔知亦唔想知，可能佢驚我同馬生復合啩！」林雅詩指她早已將Ana的電話封鎖，但對方總是出現，她無奈說︰「因為工作關係，佢仍然喺一啲工作群組內，但佢成日改名、改電話，又轉身份叫過Anna、陳小姐等。」
談到遺失電話，林雅詩回想有一次因弄傷手入院時遺失，當時馬天樂和Ana都在場，她說︰「嗰一刻佢哋都喺我身邊，當時我冇諗過唔見部電話要去報警。」問她最擔心被公開甚麼資料？林雅詩說︰「我有lock部電話，但我有好多朋友嘅電話、相片同埋對話，呢啲都係私隱。」
問到林雅詩電話內有否與前男友馬天樂的私密照？她說︰「親密照一定有，床照都有，但唔係嗰啲核突相，始終我同佢都告一段落，唔想再翻炒出嚟。」至於對方為何事來威脅她？林雅詩說︰「我都唔知佢想要求啲乜，寫幾句message嚟就威脅我。」林雅詩稱最費解是對方說不要搞到她︰「我心諗係你哋搞出嚟，點解講到咁樣。」林雅詩表示已保留威脅她的留言，不排除採取法律行動。
