【爆相爆片】ViuTV真人騷選秀節目《全民造星III》總決賽上周六晚雖已圓滿落幕，但比賽終結卻正正是愛情故事的展開，26歲的關嘉敏（Carman）及24歲的陳澤言（CY）因同屬B組而日久生情，成功譜出姊弟戀。昨日分別有兩位讀者透過《蘋果》的「爆相爆片」報料，指前日目睹CY跟Carman遊港鐵河，Carman不但於港鐵車廂內依偎CY，之後二人更拍拖逛尖沙嘴商場。
哄動全港的《全民造星III》的三甲上周六誕生後，大部份參賽者開始重投日常生活，昨日讀者K小姐就向《蘋果》報料，指前日在北角港鐵站發現CY和Carman，她說：「下午4點，我喺北角站上車時撞見佢哋，雖然佢哋戴住口罩，但CY一眼就認得出，而Carman對鞋我之前都見佢着，佢哋一入車廂就行埋另一邊，我見到Carman挨咗落去CY度，由於我喺炮台山落車，所以唔知佢哋去邊。」
原來CY跟Carman乘坐港鐵到了尖沙嘴站，二人拍拖到K11商場，又被另一位讀者C小姐撞到正，C小姐說：「噚日下午4點半，我喺K11地庫間D-mop撞到Carman先，因為我有睇《造星III》，係佢follower，佢迎面行過嚟，我好肯定係佢，佢一路行一路講電話，跟住好快行出K11去西鐵站，原來係join CY，沿途都有人望佢哋，但佢哋行得好快，亦唔見有拖手，佢哋落咗去尖東西鐵站之後，搭到去紅磡站轉車，我都係嗰個站轉車，但之後唔知佢哋去咗邊度。」根據兩位讀者提供相片，Carman所戴啡色畫家帽及CY所穿的白色鞋的黑色冷帽，均曾於他們的Ig出現。
《蘋果》昨日向CY求證與Carman拍拖，他表示：「可唔可以轉頭再打畀你呀？我𠵱家有啲嘢做緊。」但之後一直未有回覆。至於Carman則未有否認，只表示昨日曾到尖沙嘴還衫，對於跟CY拍拖，她直認大家互有好感：「我同CY因為《全民造星III》認識，多咗了解，我同佢互相對大家都有好感，你話發唔發展到，睇吓我哋之後點樣再溝通、了解大家啦，希望大家可以畀啲空間我哋。」
據知Carman年半前曾與公司組合BOP天堂鳥成員葉灝基（Gordon）傳緋聞，但半年後便分手，對此Carman只謂：「我同Gordon係同事同好close嘅friend，傾得埋。」至於CY在20強和總決賽當晚曾說：「多謝我生命中三個好重要女人。」前日他在Ig開live時，只提到兩個女人是《造星III》監製花姐黃慧君和B組導師彭秀慧，令人懷疑第三個女人正是Carman。
Carman乃舞技高手，2016年加入天盟娛樂，是五人女子組合Bingo的隊長，但四年來發展麻麻，直至參加《造星III》表演不俗，人氣急升，可惜進級十強時輸了給陳葦璇飲恨。而CY雖然唱功似陳奕迅（Eason）被讚賞，但有指賽果中，評判部分僅得一分，不少網民推測是ViuTV製作部副總裁金廣誠在CY表演後點評︰「你把聲有少少似Eason嘅初期，我好想你有自己Style出到嚟」，但CY卻口直心快說︰「但係呢個係我把聲嚟喎，我平時講嘢都係咁嗰喎。」疑因此得罪對方。
