因武漢肺炎令賽程一度延期嘅新一季澳職，終喺禮拜一開打，開鑼戰由西部聯主場對阿德萊德聯，結果悶和0:0完場。今季重返阿德萊德聯嘅前鋒杜米祖歷（圖左），完半場前接應長傳，禁區內笠射射過出迎嘅門將，可惜被中堅今井智基白界線前解圍。換邊後，阿聯中場賀路雲左路突破後射遠柱，畀西部聯守將艾朗卡爾華門前踢走，最終西部聯喺兩次護空門下守和阿聯各得一分。