阿里（9988）隊到爸爸媽媽都唔認得，其他科網龍頭在反壟斷陰霾下，亦難獨善其身，騰訊（700）及美團（3690）跌穿短線支持位，ATM由以往撳錢變成被提款了。相反，舊經濟股繼續抬頭，內銀受惠螞蟻被打，中資電訊股亦適時翻生，令指數企硬在26000至27000點區間，這個玩法相信在今年餘下日子持續，想搵食嘅唯有在熱炒板塊尋寶。
海爾電器（前上市編號︰1169）私有化後，阿媽海爾智家（6690）變相在港上市，前者主打洗衣機、熱水器及物流，併合後的海爾智家，新加入雪櫃、冷氣及廚房電器，還包含海外業務，除變得更多元化外，更能體現智能家電的優勢。無怪乎大行全面唱好，其中麥格理睇得最牛，目標價達41.7元，潛在升幅超過五成，其他券商亦全線給予買入評級；無他，阿爺講明透過「需求側改革」狂谷內需，資金緊跟國策下，海爾智家自然水漲船高。
還有兩點要留意︰第一，海爾智家可視作半隻新股，圖表上已進入無蟹貨區，只要陽燭繼續出現，強勢暫未扭轉；第二，上周三掛牌以來，至今連續三日均打入北水十大成交榜，可見已得到內地資金垂青，後市值得看高一線。
唐牛