【本報訊】12港人案開審，卻無即日宣判。一眾家屬昨晚召開記者會，直斥內地法院「秘密審訊」，要求當局勿再以「擇期宣判」等理由，無了期拖延釋放12港人的日期，也批評港府轉交信件外未有任何作為，反問「其實我自己搵順豐速遞都做到嘅嘢，咁我使咩搵呢個政府？」
被控組織偷越邊境罪的鄧棨然之弟弟表示，鄧棨然及喬映瑜的官派律師「神秘」，常託詞拒聽電話，「核實唔到我哋嘅身份，又話自己好忙」，甚至拒絕向法官提供量刑建議。鄧弟質問：「（律師）唔係應該要為當事人爭取最佳權益咩？」他也批評政府只會轉交信件：「但其實同郵政署、順豐速遞做嘅嘢都一樣」，「其實我自己搵順豐速遞都做到嘅嘢，咁我使咩搵呢個政府？」
李子賢的母親在記者會反問：「你要玩，就玩我哋大人。佢哋都係小朋友，坐咗四個月……即係幾時，拖到幾時，我哋先可以見到我哋個仔？」她也質疑官方稱有家屬旁聽，究竟是誰。黃偉然母親表示：「我請求鹽田人民法院快啲判決，我好想見我嘅仔一面。」家屬公開聲明直斥內地法院秘密審訊，是次審訊過程不公不義，是赤裸裸的政治迫害。
12港人關注組成員鄒家成重申，港府有責任保障港人安全，希望港府派人陪家屬到內地旁聽，希望當局盡快宣判，讓家屬探訪。
協助12港人的前立法會議員朱凱廸稱，內地當局希望以政治手段拖延，因為12港人非正式囚犯，家屬無正當法律基礎申請探視，又擔心兩名未成年被告的聽證會也會無限期押後，此做法踐踏人權。