有線新聞部早前喺未有諮詢部門主管下黑箱裁員，觸發中國組等多個王牌部門要員集體辭職。內地爆發疫症初期曾冒險到武漢採訪嘅有線中國組，亦趁疫症一周年推出武漢肺炎專題報道，重返武漢走訪死者家屬、義工同前線醫護，佢哋亦係fb預告，呢個會係現任中國組成員最後一擊。
集體請辭抗無理裁員，現有有線中國組做埋今年就完，佢哋今日喺facebook出post宣傳新有關武漢肺炎嘅專題報道，亦都hashtag「最後倒數」。作為最後一擊，呢個專題報道亦十分重磅，佢哋喺武漢爆發疫症一周年重回當地，走訪死者家屬、義工和前線醫護，希望反思呢場世紀疫症帶嚟嘅教訓。
一連四集主題分別係〈未忘人〉、〈逆行者〉、〈主旋律〉同〈吹哨聲〉，每集都帶出一個問題，關注失去至親嘅家屬如何走下去、當局宣稱靠制度優勝打贏保衞戰，義工嘅角度又係點，亦探究內地當局點樣塑造主旋律，對外對內宣傳抗疫成就，最後透過前線醫護同早期病人，重組時序，質問當局有冇吸取教訓。
中國組嘅帖文引述一名化名王鵬嘅武漢醫生嘅說話：「（最早公佈疫情的內地醫生）李文亮是白死了。現在的醫生非但沒有繼承該說實話，反而是嘴巴被捂的更嚴。」佢哋嘅報道有乜嘢答案？似乎由呢句說話可見端倪，詳情當然有待報道出街，呢個專題會係今晚起一連四晚9點半喺新聞台《有線中國組》時段內播出，好多網民已經係有線中國組fb專頁留言，多謝佢哋一直嘅採訪同付出。
李八方