美國商務部早排將香港飛行服務隊列入制裁名單，美國或者唔再出口飛機零件嚟香港，分分鐘要改用國產貨。可能林鄭都明白早搭早享受，噚日就去咗飛行服務隊總部，唔係坐定翼機去布袋澳監視偷渡船隻，而係坐直升機視察三跑填海工程、新界西土地同邊境口岸，唔知係有心定巧合，佢今次去視察飛行服務隊總部，入面竟然暗藏「送中密碼」！
喺12港人送中案開審前夕，777居然去「慰問」飛行服務隊，都算可圈可點，而八方仔細睇政府新聞處片段，發現負責執行部份「送中行動」既BLVH直升機同BLVB定翼機，居然有份入鏡！仲同林鄭黎咗一張「歷史合照」。早前被12港人關注組披露嘅機組成員名單入面，飛行行動經理、高級機師Emily Wong更有份出鏡，林鄭仲有一句開場白：「我今年授勳呀，有冇女機師呀？」Emily就撲出黎接受介紹。
林鄭「離地」視察去到最後，直升機低飛到上環港澳碼頭時，窗外嘅船相當清晰，八方睇返飛行高度，原來同當日直升機監視12港人落入中國水警嘅飛行高度相當接近，由此可見送中當日登上直升機嘅警員，清晰見到當日拘捕情況。呢一場大龍鳳係攞景定贈興？相信讀者有答案喇。
李八方