傳媒例行公事做2020大事回顧，香港人「捱打捱告」兩年，回顧，兩隻字，令人好攰。不過咁，2020全天候蒙面的高官名流，不論藐嘴藐舌賤肉橫生嘴臭過糞，通通給蒙住，阿門。CCTVB新聞總是轉播立法會爭住扮「質」高官的傍友，睇真啲，班友一條底褲口罩都冇戴過，擺明當鄭月娥代言的阿婆底褲透明。坊間有人盲眼龍婆上身指點江山說鄭氏必然得寵連任，哎，不如話，土木相合中的那個土，是連土豪馬雲都驚的習帝，木就係傍住習帝那個絕對唔敢大過主人婆的鄭氏妹仔。相合呢，讀者自行想像，唔使打格（唔係聖誕樹或者「香港獨立」嘛）。明年今日，鄭氏connect住習帝條龍脈，冇得輸。由大事回顧「優化」為神預測，大台識做的。
西環相合鄭氏，這兩年的所作所為，令香港無法回到2019前。返唔到轉頭的香港人，流徙海外與堅守本土，雙雙急速異變。變種真香港人求存，遇強愈強，極權就算操控疫苗，「專家」說，仍無法抵擋無病徵感染。強制全民檢測禁足，表面乖順配合威權打針、內心不相信可「回復正常」的人，睇到英國驗出的武肺變種，取名VUI2020/12，靈光乍現，毋忘初衷。這個生於2020的異種VUI點解讀？內外團結，大家心照。