下一任美國總統係咪大局已定，問一問所謂「當選副總統」辭去參議員一職未？據報仲未，就好似打工仔有offer但係未簽約，梗係打死都唔辭職啦。
好多識美國朋友嘅香港人成日都話：我啲朋友多數撐拜登。呢個取樣並冇參考性，大選總票數係真定假仍然有爭議性，不過投票分佈應該係真，城市傾向拜登；鄉郊傾向侵。香港人去到美國，識到城市人嘅機會較大。
除咗反侵之外，究竟有咩人會真心支持一個老政客呢？高明一直百思不得其解，直至一個美國朋友P分享一段拜登演講，表現有如一般政客，朋友P竟然話：「咁樣先係一個總統講嘢」。佢講完我先明白到，支持者來自一群渴望安逸嘅選民。
因為真正嘅轉變，過程必然會帶來痛苦。世界經濟發展到另一極端，社會精英多數成為大企業嘅一粒螺絲，每日埋頭生產工序一小部份，安份守己，月/星期尾穩陣出糧。轉變機會成本太大，把口可能支持政治正確議題例如女權、同性戀等等，實質恐懼轉變，你睇「當選副總統」仲未捨得辭工，就知打工仔幾恐懼轉變。
拜登嘅象徵意義，就係安逸。美豬明知要變，但唔願接受轉變嘅痛苦，惟有選個齋吹唔做嘅人安慰自己。
每個人心入邊，可能都有個祖拜登，希望食長期飯票，害怕轉變，又要扮潮。喺香港，我哋稱呢啲人做港豬。可惜過去兩年，香港人見過無數難以想像嘅變幻。即使「我唔知、我睇唔到、我唔理、我討厭政治」，一隻螞蟻集團IPO，竟然可以上市前兩日取消。相對身於安逸嘅美國城市中產，香港人反而見過世面。
新年決志，不論工作、股票定其他，提防被內心嘅「祖拜登」支配。港豬嘅生存空間越來越窄，怕轉變帶來痛苦，最後「被轉變」可能更痛苦。
高明