ViuTV節目《全民造星III》昨晚假九龍灣舉行總決賽，進入十強的參賽者施展渾身解數，結果由表演折骨舞的趙祥誠（Ben）憑觀眾投票較高票數爆冷奪得冠軍，評判得分同分的陳葦璇與陳毅燊（ANSONBEAN）則分別屈居亞軍及季軍，大熱的雲浩影（Cloud）同樣三甲不入，不過由於投票系統一度失靈，令賽果被質疑。
備受熱捧的ViuTV選秀節目《全民造星III》昨晚於九龍灣Star Hall舉行總決賽，進入十強的參賽者施展渾身解數，結果由黑馬趙祥誠得冠軍，陳葦璇屈居亞軍，季軍是陳毅燊。由於昨晚不設現場觀眾，故場內全部是工作人員及傳媒，大會在座位上綁上螢光棒搞氣氛，台上表演者則要在72小時內接受檢測才可上台，場內座位也相隔1.5米。
首輪比賽前，大會先公佈全民投票結果，雲浩影得到32.6%領先，之後是陳葦璇及ANSONBEAN。去年都有參賽的劉瑞祈（K LAU）得票最少，也是昨晚第一個出場，他表演完後把握時間講得獎感言：「多謝家姐細妹，兩個家姐知我自由身冇人湊今日專登嚟。」
票后Cloud表演初段自彈自唱，但掛在身後的收音裝置太重，扯低條褲，鏡頭也影到走光一刻明顯露白底。一向跳舞出色的李靜蓮（Alina）以紅色超低胸舞衣登場，酥胸半露又被舞蹈員在半空拋高揈低、一字馬，演出超火辣。不過第一輪演出完畢，有網民投訴參賽者極少選擇廣東歌。而穿上黃色外套，內穿bra top的葉巧琳，為今次比賽創作了一首新歌，在第二輪比賽會唱出，她說：「在casting之後已有好深感受，所以寫咗一首歌，想送畀每位參賽者。」
第一輪以紅白dance battle完畢，評判毛舜筠（毛姐）表示無論在電視或現場睇都一樣好興奮：「都想除鞋企起身一齊跳，好勁！」而鄧麗欣則指自己是《造星III》粉絲：「我係你哋fans，由第一集開始睇。」之後第二輪Alina表演有Manson幫手，評判ViuTV高層金廣誠表示：「四年前佢唱歌由頭喊到落尾，今晚係另一個佢，刮目相看，完全可以喺紅館做show。」黃劍文有方方伴舞，毛姐：「你唱歌喺十強裏面係數一數二，《全民造星》做咗個歌神出嚟。」Ben沒有唱歌，繼續表演最強項的折骨舞，王菀之就大讚：「坦白講，台上有好多人好叻，但你係嗰種細膩嘅表演，折骨舞就好刺激。」最後成功奪冠。
ViuTV昨晚設立了全民投票，投票分數將會與星級評判各佔50%。不過昨晚比賽進行期間，在《造星III》直播畫面及ViuTV fb就不斷有網民投訴系統失靈，網民留言指就算輸入了電話號碼，也沒有收到驗證碼，又有人指根本入不到網站，令很多網民質疑比賽結果是否公平。最後大會卻公佈Ben憑觀眾投票獲得冠軍，大熱的Cloud反而三甲不入。
四位評判都只是一面倒「有讚無彈」，遭網民鬧爆「好假」，寧願召喚之前的評判欣宜、許廷鏗做總決賽評判。在第三輪的比賽後，評判輪流對每位參賽者給予評語，當K Lau唱完後，鄧麗欣向他說：「好舒服，好感動，好好睇，所以得唔得到獎，你已經贏咗。」之後又讚Cloud：「我睇到佢有好多可能性，頭先黑色嘅rock，𠵱家白色嘅柔情，好駕馭到舞台，印象非常深刻，但最令我深刻係之前你嘅演戲，我非常欣賞你。」但都未夠毛姐讚得誇張，指ANSONBEAN是《全民造星》這顆「星」，她說時有點語窒，逐個逐個字說：「唱得、跳得、有樣、有台型，《全民造星》你就係嗰粒星！咁靚仔，去做戲啦，演技方面會有新嘅發揮。」她直認已被ANSONBEAN俘虜。