平安夜法甲班霸巴黎聖日耳門（PSG）傳炒咗教練杜曹，被指將會由前熱刺主帥普捷天奴接手。早前已經有傳今季喺熱刺不受重用嘅迪利阿里1月可能會以外借身份加盟PSG，如果真係由普帥接掌，佢過檔睇怕都係時間問題。不過，原來PSG搵普帥教最大嘅心願，係呢位阿根廷教頭可以幫手說服同鄉美斯加盟。
喺普帥教熱刺嘅時間，阿里可以話係佢一手湊大嘅球員，可惜佢今季喺摩連奴麾下徹底失寵。上周阿里難得喺英聯盃打正選，踢得唔好之餘，被換走時仲發老脾，賽後摩佬公開話佢係球隊製造問題嘅人，睇嚟兩人關係已經冇得返轉頭。其實一直有傳PSG對阿里好有興趣，阿里自己都要爭取表現博入英格蘭國家隊踢明夏歐國盃決賽周，如果真係由普帥執掌嘅話，佢1月轉投PSG嘅機會都相當高。
不過，有指PSG搵普帥嘅終極原因，係希望佢可以幫手游說球王美斯加盟。下年1月，季尾同巴塞隆拿完約嘅美斯就可以同唔同球會傾定下季自由身轉會，PSG已經有尼馬同迪馬利亞等美斯嘅好友喺度，PSG就希望由同樣嚟自阿根廷嘅普帥幫吓口，爭贏傳聞對手曼城，加上肥普本身都被公認有料到，2019年就帶領熱刺打入歐聯決賽，令美斯加盟嘅成數更大。