相信唔少球迷都有玩過《Football Manager》（FM）系列嘅遊戲，呢隻game喺外國更加令唔少玩家為之瘋狂。近日網上流傳一張相，有位《FM》玩家竟然喺自己結婚當日帶埋部電腦，喺婚禮現場當住新娘面前打機（圖），好多網民稱佢為「最勇敢嘅FM玩家」。呢位叫Burak嘅新郎哥嚟自土耳其，係一位《FM》迷兼特拉布宗球迷。Burak受訪時話張相係一場意外：「當日我帶部電腦去婚禮會場，準備將我同太太相識過程嘅短片交畀婚禮統籌師播放嘅，不過由於技術問題，我同太太都要留喺休息室度等，咁我咪拎部電腦出嚟扮打機，等朋友幫我影張相囉。」