現年43歲的《東張西望》主持Patrick Sir林溥來和35歲的太太關宛珊（Kimmy）昨日boxing day宣佈造人成功，恭喜晒！這是繼前日胡杏兒和余香凝宣佈有喜後，再有藝人追B成功。Patrick Sir在Ig貼上夫妻「床照」，他赤裸上半身，陪腹大便便的太太一齊影合照，透露太太陀B仔，笑言加上愛犬Don Don可以組成超級男團。
準媽媽關宛珊昨日接受傳媒訪問時，透露生BB是計劃之中：「我哋計劃咗今年搬屋settle好之後就努力造人。」問到疫情下陀B會否很擔心？她說：「當然會，不過自己做好啲都OK，心情輕鬆嘅，每次去完產檢後，都即刻返屋企換晒啲衫先，今年見屋企人都只係見過一、兩次。雖然有啲似監禁咁，但都開心嘅，𠵱家唔使去買餸，通常都係Patrick去街市買返嚟，呢段時間辛苦晒佢。」她透露預產期是明年4月，笑說：「屋企好重陽氣，成屋都係男人，我老公+BB+我隻狗狗可以組個男團。」
Patrick Sir則在Ig寫道：「聖誕快樂！係呀，你冇睇錯呀，你睇到嘅呢個天使化身係我老婆Kimmy呀！見到佢個肚多咗啲嘢？嗰個係上天送畀我哋嘅聖誕禮物嚟㗎，份禮物我哋五個月前已經收到，仲睇住佢越嚟越大，而老婆面上嘅笑容就越嚟越甜。選擇喺呢個普天同慶嘅聖誕節及boxing day同大家一齊拆禮物，就係想將我哋呢份喜悅同各位分享，為大家喺疫境中打打氣，增添正能量！感謝上天送畀我哋嘅新生命，亦希望世界從此換上新氣象！老婆，雖然每次問你你都話唔辛苦，但係我都要再講多次：辛苦你喇！嚟緊你要對住我同Don Don加BB呢個超級男團，你一定要有更多嘅耐性，但係我保證我哋必定努力為你奉上幸福、快樂！」
