聖誕佳節，胡杏兒及余香凝都着上聖誕裝分享好消息。與老公育有兩子的胡杏兒，昨日宣佈陀第三胎，BB明年中出世，但她陀B期間竟還到內地拍真人騷搵真銀，不過杏兒指因不想有特權，所以沒告知劇組懷孕消息，其老公李乘德為此大讚老婆是女人典範。余香凝上月閃婚，當時已傳她奉子成婚，昨日她也正式公佈懷孕喜訊。
現年41歲的胡杏兒2015年與圍村老公李乘德（Philip）結婚，兩人育有三歲大仔李奕霆及一歲細仔李奕霖。昨日趁着聖誕，她在社交網貼出一張在聖誕樹下的單人相，戴口罩托住巨肚，宣佈陀第三胎，她留言指一直想生三個︰「我來自一個有兩個姐姐的家庭，從小就體會到三姊妹的好處，一直覺得如果能有三個孩子會是一件特別美好特別幸福的事。」
杏兒昨日回覆《蘋果》指第三胎是計劃之中：「聖誕節都係一個好開心日子，揀呢日話畀大家知好消息，一直以嚟希望有三個小朋友，好感恩。」杏兒指生仔或女都冇所謂，最緊要BB健康，預產期在明年年中。她月初在內地拍完內地真人騷《演員請就位2》後回港安胎，現正家居隔離，預計下周四除夕出席活動。她更自爆拍攝《演員請就位2》時，未有跟劇組透露懷孕消息：「希望自己冇特權，可以公平公正比賽，最後拎到好成績好開心，BB一直陪自己好開心。」
杏兒指第三次陀B很有經驗：「次次陀B都有工作在身，因為前階段都唔會見肚，可以收埋，都多謝BB好乖，一切順利，有喺內地做檢查，keep住好安全、順利。雖然工作上有啲壓力，同普通女士一樣，但係做嘢時係冇影響。」杏兒老公Philip亦在Ig出post報喜，大讚老婆是好媽媽，讚她能兼顧家庭、工作，是女人典範。
余香凝上月與圈外人陸政渡閃婚，當時一直避談是否懷孕，昨日余香凝在Ig貼相認陀B：「謝謝上天賜給我們最好的禮物。」她也分享陀B心情：「每日都仲係覺得好奇妙，一個小生命喺我嘅肚入面，好感恩！我同老公都好開心，希望BB健健康康肥肥白白。」
余香凝胞妹余潔滢對於快將做姨姨也表示開心期待：「好想快啲買好多好多衫褲鞋襪畀佢。我成日都叫住佢（余香凝）唔食得乜嘢， 一齊做嘢又成日企喺佢隔籬驚佢攰，驚佢行路唔小心。」另外，鄭中基前晚在其YouTube頻道貼出《暖男爸爸》番外篇《假使聖誕原來不像你預期》勉勵港人，余香凝拖着「暴龍哥」JuJu出場，着鬆身連身裙的她臉圓圓、身形發福，當時孕味已甚濃。
莊韻澄（前名莊端兒）月中宣佈懷孕，昨日聖誕她陀B拍攝翁子光監製的電影《正義迴廊》，令她覺得今年聖誕節很難忘︰「最特別係帶住BB一齊開工，忙到連聖誕禮物都冇時間準備畀老公，哈哈！」她又說陀B只嘔過一次，身體也沒有太大改變︰「最大變化只係要不停去洗手間，反而呢樣最唔方便。我開始感覺到BB跳動啦！其實我算係幸運嘅孕婦，咁耐以嚟只嘔過一次。」問到陀B開工會否辛苦，莊韻澄說︰「冇乜辛苦呀！劇組甚至有人睇唔出我有咗，但佢哋都好照顧我， 而BB通常都係一早一晚郁得比較多，所以冇影響我工作。」她又指現時仍未見肚，不用刻意着衫遮肚。
