【名家足路】
【對決場次︰阿士東維拉vs水晶宮】
上周德甲奧格斯堡輸咗畀法蘭克福，11月盟主港生終於喺《一燈決》開齋，我真係恭喜佢呀。嚟到本月最後一期，小弟推介紅人基亞利殊隊阿士東維拉，主場穩勝落水狗水晶宮。
自藍神前幾日認祖歸宗，香港維拉球迷會即刻呼籲大家唔好再用「維拉柏豪」稱呼基亞利殊，仲hashtag「兩個層次」，擺明要割席。基亞利殊最近因為不小心駕駛罪成停牌九個月，係有啲負面新聞，但呢位維拉青訓呢刻仍對母會一條心，起碼冇為錢轉投大球會，唔似藍神上年反送中曾喺ig叫人記得投票做選民，俾五毛標籤為港獨分子，但今日為咗賺人仔高調轉投藍營，學華大姐話齋，係會釘喺歷史嘅恥辱柱嘅。
講番場波，今次推介維拉唔係因為佢哋贏利物浦7:2，後者啱啱炒水晶宮七蛋，條數係咁易計就好。維拉上季僅護級成功，今季暫時12戰得22分，如果單計失波，佢哋失少過目前第二位嘅李斯特城。維拉中鋒奧尼屈堅斯水準雖然飄忽，但好在拍檔基亞利殊同安華艾加斯交到貨，加上門將達米安馬天尼斯加盟，防守變咗兩個層次，12場有7場不失球，冠絕英超。
水晶宮上場慘敗，有人話係鶴臣回饋紅軍，信不信由你，不過翻查過去三季，佢領軍下嘅水晶宮，6次聯賽同紅軍交手竟然輸足6次，呢位前領隊都算係利物浦嘅送分童子。水晶宮今仗鬥維拉除咗馬馬度沙高幾位長期傷兵外，基本算「夫添」，但哀兵上陣，點都難睇好。
文：筋肉人
《一燈決》係今季新欄目，由上月擂台盟主同上月燈神拗吓頸，睇吓讀者信邊個。