盛傳星期六人大常委會將出手DQ大班民主派區議員，其實唔使等人大常委會出手，港府官員同部門已經用盡方法打壓佢哋。區議員林兆彬前日話民政事務處大興文字獄，以「為免引起誤會及影響社會和諧」呢個荒謬理由，拒絕撥款畀油尖旺區議會製作「香港加油」節日燈飾，究竟「香港加油」會引起乜嘢誤會，又點影響社會和諧？民政處當然唔識答、唔會答又唔敢答啦！公民黨副主席譚文豪就代答，質疑民政處真正目的係曲線寸特首林鄭月娥「影響社會和諧」！
譚文豪喺facebook發帖話，其實777好鍾意同大家講「加油」，例如今年2月政府派一萬蚊嗰陣，林鄭就話派錢係「幫市民加油」，仲唔係影響社會和諧？5月777又話好多同佢講「加油」嘅市民，叫佢快啲就《基本法》23條立法，唔知係咪咁引起佢誤會，所以出賣香港人嘅僅有自由，令港人硬受港版國安法。
其實唔少香港人每次聽到777講嘢就好不安，情緒受影響，再加埋聽到佢講以上內容，又真係會引起誤會，甚至影響社會和諧，唔通民政處都心知肚明，知道777講過「加油」，再用會令好多香港人喺節日唔快樂，所以先禁用「香港加油」？
大鑊嘞，林鄭講咁多嘢，一時話「我做錯甚麼」，一時話「迎難而上」，加埋「一如以往、不偏不倚、絕不姑息、強烈譴責、細心聆聽」，怕且民政處嘅禁用名單越嚟越長！其實香港言論自由喺今年7月之後已經畫上句號，連曾經係立會競選口號嘅「光復香港，時代革命」都被政府定義為分裂國家，「香港加油」會唔會有咁嘅一日？八方悲觀相信一定會。
李八方