今年受武肺疫情影響，香港各行業幾近陷入停擺，就連今個聖誕節，香港人都要孤單的留在家中避疫。樂瞳日前接受《蘋果》專訪，也大嘆工作大減要連月來宅在家中，令她壓力大增負能量滿瀉，幸有愛犬的陪伴才讓她渡過難關。向來不乏人追求的她，更揚言經此一「疫」，現在已不介意沒有拖拍，更謂要無限期閉關，寧願要事業不要愛情。
香港武肺疫情進入第四波後，完全沒有減退的迹象，今個疫下的聖誕節，34歲的樂瞳表示會靜靜宅在家度過，「聖誕冇得出街，會約埋屋企人聚吓，簡簡單單煮吓大餐，珍惜同家人相處嘅時間。呢一年好多地方去唔到，幾個月前，以為聖誕可以出吓關，點知都要匿埋喺屋企，希望疫情快啲過。」
過去一年世界各地都「封關」，最愛到處遊埠的香港人似乎已習慣留在家中避疫，而且大環境也難以出外旅遊，連樂瞳也毫不例外，壓力倍增之餘，積聚了不少負能量，樂瞳說：「成日困住喺屋企，以前我好多時每個月都有機會離開香港，無論去工作或自己出遊，飛咗出去，就好似釋放咗壓力，睇見外面嘅世界好大，唔好嘅嘢都會放低，𠵱家成日都匿埋喺屋企，唔多唔少都會有負面情緒，多嘢諗咗，我會多咗擔心自己未來工作，壓力亦會多咗。」樂瞳表示盡量不鑽牛角尖，又自爆會攬着愛犬減壓：「寵物好簡單，你畀嘢佢食，佢就好開心，見佢開心，我都會開心。」
問到樂瞳為何是攬狗，而不是攬着honey？向來不乏裙下之臣的她卻說：「我冇honey，不嬲都冇，成日話『事業得意，情場失意』，疫情下我成日匿埋屋企，自己個人都『摺埋』咗，自己都驚。」
樂瞳表示避疫不敢到處去：「𠵱家地球好危險，我唔會隨便去人哋屋企煮飯，熟先可以去。」過去一年避疫，34歲的樂瞳自爆現已「冰封」感情：「無限期閉關，我都『封關』變宅女。」樂瞳表示不介意沒有拖拍，現在寧要事業不要愛情，她說：「我越嚟越覺得女人嘅安全感嚟自事業，自己事業好啲，滿足感大啲，又可以畀屋企人同自己好少少嘅生活。如果仲未嫁到，我有諗過不如先考慮買間姑婆屋畀自己終老。」
問到樂瞳聖誕想收甚麼禮物？她說：「邊個女人唔鍾意收禮物，今年聖誕大家平平安安，身體健康，身邊朋友唔好『中招』就好喇！」至於又會給友人送出甚麼禮物？樂瞳即說：「送吓我賣嘅酒同飛吻畀大家。」
撰文：比華利
場地提供：Rehab
服裝提供：MZ JJ
