日職上個禮拜煞科戰，大家睇住拎咗冠軍嘅川崎前鋒，最後一場反勝柏雷素爾3:2，咁畀心機踢呢場，就梗係有後着，事關日職完畢就輪到天皇盃，前鋒以日職冠軍身份，就直入四強，對住秋田藍閃電，呢場簡直係大人同細路仔踢波一樣，前鋒讓車馬炮都一定贏波。
因為疫情，今屆天皇盃就改制，日職冠、亞軍就直入四強，對住乙、丙組晉級球隊。前鋒今季幾威就唔使點講，淨係34場波入88球已嚇死你，今場波仲喺等等力陸上競技場主場出擊，就算用咩兵，「入球大細」同埋「讓球」盤，都一定開得好辣。不過咁，如果臨場睇陣容，前鋒如有一半以上主力作賽，就算讓到三球/三球半都唔係問題，始終日職級數同秋田藍閃電呢啲日丙隊，個人能力及體能上都有一段極差距離，仲要留意番秋田藍閃電，上場八強都用咗唔少力，前鋒踢法又進取，上盤加大唔係問題。
另一場準決賽就好睇同接近好多啦，日職亞軍大阪飛腳會對住剛拎到日乙冠軍、下一季升班嘅德島漩渦。頭先講日職同日丙嘅實力分別好大，不過日職同日乙就唔同講法，踢法、體能基本上兩個級別都好接近，只係外援質素有別。我今季都留意德島漩渦，全季比賽都有睇住，三線穩定、入球有保證，仲有老虎仔新紮上位，一定搏晒命俾日職球隊一個下馬威，所以極力推介德島漩渦下盤。
文：黃耀富
截稿前馬會尚未開盤，盤口僅供參考，讀者記得留意足智彩網頁。