聖誕食番粒糖是常識吧？所以近期氣勢順番好多嘅曼聯，就嗒咗「拖肥糖」嚟迎接聖誕，周三英聯盃靠卡雲尼同安東尼馬迪爾尾段各入一粒，2球力挫愛華頓入4強，抽籤後會同同市宿敵曼城激鬥爭決賽席位。不過，紅魔呢場波贏得都有爭議，事關入波嘅卡雲尼喺比賽期間曾經叉頸對付拖肥中堅耶利文拿，但球證冇發現，加上呢項賽事冇VAR幫手執法，就咁逃過法眼冇被逐，而且幾分鐘後又有艾歷拜利膝撞李察利臣，又係冇罰，賽後網民又寸「4424」紅魔又嚟料！
曼聯上輪英超先大勝列斯聯6:2，呢場波對住近況都好、累積三連勝嘅愛華頓，踢得都幾辛苦，但最後運氣都係落喺紅魔身上；88分鐘，馬迪爾助攻卡雲尼打破悶局，到補時六分鐘，呢位近仗開始翻生嘅法國前鋒單刀破網，1傳1射助紅魔贏2球，成功躋身呢項盃賽四強。
不過，入魔後取得個人第四球嘅卡雲尼，喺比賽52分鐘左右同對方中堅耶利文拿喺中圈發生口角，其後卡雲尼伸手叉向文拿條頸令佢倒地。不過，球證馬特利就睇唔到呢幕，同時因為英聯盃冇用VAR協助執法，所以冇得追究，事後唔少愛華頓球迷都對卡雲尼冇被逐好不滿，名宿連尼加都話如果有VAR，卡雲尼肯定會俾人秋後算賬；事發後只係幾分鐘左右，紅魔中堅拜利又因為爭頂，膝部撞咗落李察利臣個頭度，仲同般奴費南迪斯一齊請呢位巴西前鋒「食三文治」，搞到後者因傷被換走，但球證一樣冇吹。
關於卡雲尼，佢嚟到英倫後都似乎惹出唔少事端，好似之前就喺社交網慶祝入波捲入歧視風波，最近就被英足總追究起訴停三場，家陣仲等緊曼聯上訴。不過，曼聯領隊蘇斯克查賽後就嘗試淡化今場爭議：「我覺得冇咩大不了，只係兩個南美人場上有爭拗，經常都有呢啲身體碰撞同對抗㗎啦。」唔知蘇B咁講大家又接唔接受？
點都好，家陣曼聯就聯同同日以3:1贏史篤城嘅熱刺，一齊入四強，賽後已經完成埋四強抽籤，結果曼聯又再抽中同哥迪奧拿領軍嘅曼城交手，同上季一樣都喺呢個階段上演曼市打吡，但上次係兩回合，今屆就因為武肺變咗一場過，而紅魔仲要坐擁主場之利。蘇B就話上季3項盃賽都喺4強止步太丟架，今次一定吸取教訓唔會再失威。